टी–२० विश्वकप एसियाली छनोटमा नेपाल कतारसँग ४ विकेटले पराजित

<p>काठमाडौ । टी-२० विश्वकपको एसियाली छनोटको पहिलो खेलमा नेपाल पराजित भएको छ। टस जितेर पहिले ब्याटिङ गरेर नेपालले दिएको १ सय २३ रनको लक्ष कतारले ६ विकेटको क्षतिमा ४ बल अगावै भेट्टाएको हो। <br><br>सिंगापुरको इन्डियन एसोसियसन मैदानमा नेपालले सबै विकेट गुमाउँदै १ सय २२ रनको योगफल खडा गरेको थियो।<br><br>सटिक सुरुवात गरेका २ अनुभवी ब्याट्सम्यान कप्तान पारस खड्का र ज्ञानेन्द्र मल्लले पहिलो विकेटका लागि ६ ओभरमा ४९ रनको साझेदारी गरेका थिए।<br><br>पारसले २८ रन बनाउँदा ज्ञानेन्द्र २३ रनमा पेवेलियन फर्किए। पारसको पारीमा ४ चौका र १ छक्का तथा ज्ञानेन्द्रको पारीमा २ चौका र १ छक्का सामेल थियो। प्रारम्भिक जोडी पेवेलियन फर्किएपछि नेपालले लगातार अन्तरमा विकेट गुमाएको थियो। १ सय ५० रन सम्मको लक्ष्य दिने सोचिएको नेपालले खराब ब्याटिङ गर्दा पराजित हुन पुगेको हो।<br><br>नेपालका दीपेन्द्र सिंह ऐरीले सर्वाधिक ३४ रनको योगदान दिए। मध्यक्रममा सरद भेसवाकर (७ रन) र सोमपाल कामी (११ रन)मा आउट भएपछि दीपेन्द्रमाथि दबाब बढेको थियो। उनले ३५ बलको सामना गर्दा १ चौका र १ छक्का मात्रै प्रहार गर्न सके। घाइते भएका कारण मलेसियासँगको मैत्रीपूर्ण क्रिकेट शृंखला गुमाएका उनले आजको खेलमा जिम्मेवारी पूर्ण ढंगबाट ब्याटिङ गरेका थिए।<br><br>मलेसियाविरुद्ध विस्फोटक अर्धशतक प्रकार गरेका विनोद भण्डारी आजको खेलमा भने ३ रनमै समेटिए। करण केसी ४ रनमा आउट हुँदा सन्दीप लामिछाने ९ रनमा रनआउट हुन पुगे।<br><br>कतारका नोमन सरवार, इकवाल हसन र तमोर साजदले समान २/२ विकेट हात पारे। इनाम उलको नाममा १ विकेट रह्यो।<br><br>१ सय २३ रनको लक्ष्य पछ्याएको कतारका इनाम उल हकले रनआउट हुनुअघि ४१ रनको पारी खेले। ३२ बल खेलेका उनले ६ चौका हिर्काएका थिए। कमरान खानले २२, नोमन सरदारले १५ तथा जाहिर इब्राहिमले १२ रनको योगदान दिए।<br><br>नेपालका सन्दीप लामिछानेले सर्वाधिक ३ विकेट लिए। करण केसीको नाममा एक विकेट रहँदा कतारका २ ब्याट्सम्यान रनआउट हुन पुगेका थिए।<br><br>नेपालले दोस्रो खेल बुधबार मलेसियासँग, तेस्रो खेलमा शनिबार कुवेतसँग र अन्तिम खेलमा आइतबार सिंगापुरसँग खेल्नेछ।<br></p>