काठमाडौं उपत्यकामा चोरको बिगबिगी,यस्ता हुन्छन् पाकेटमाराका कोड भाषा

<p>काठमाडौं । राजधानीमा कुनै स्थानमा आउजाउ गर्दा सार्वजनिक यातायात प्रयोग गर्दै हुनुहुन्छ भने पाकेटमार तथा चोरदेखि सावधान! प्रहरीको तथ्यांक हेर्दा काठमाडौंमा चोरी गर्नेको संख्या डरलाग्दो रूपमा बढेको छ ।<br>पाकेटमाराले प्रहरीलाई नै चकित पार्ने गरी पाकेटमारी र चोरी गर्दै आएको पाइएको छ । उनीहरुमध्ये कतिपयले त आफूलाई प्रहरी संगठनकै सदस्यका रुपमा समेत प्रस्तुत गर्ने गरेको बताइएको छ । व्यावसायिक पाकेटमाराले विभिन्न क्षेत्र छुट्ट्याएर कोड भाषा प्रयोग गरी पैसा, मोबाइल तथा सुन चाँदी भएका व्यक्ति पहिचान गरी आफ्नो धन्दा चलाउँदै आएका छन् ।<br>प्रहरीले जेठमा मात्रै ८२ जना पाकेटमारा तथा चोरलाई रंगेहात पक्राउ गरेको छ।<br><br>महानगरीय प्रहरी परिसर काठमाडौंले सार्वजनिक सवारी साधनमा पाकेटमारी तथा चोरीका घटना बढेको सूचना आएपछि जेठभर सुरु गरेको विशेष अभियानका क्रममा ७८ पुरुष र ४ महिला पाकेटमारा तथा चोरहरु पक्राउ परेको जनाएको छ ।<br><br>परिसर प्रमुख एसएसपी उत्तमराज सुवेदीले यातायात व्यवसायीसँगको सहकार्यबाट सार्वजनिक यातायातमा सादा पोसाकका प्रहरी परिचालन गरी उनीहरुलाई रंगेहात पक्राउ गरेको जनाए। याे खबर आजको राजधानी दैनिकमा छापिएकाे छ। <br><br>‘एक महिने अवधिमा प्रहरीले ठूलो सफलता पाएको छ, यसबाट राजधानी थप सुरक्षित हुनेछ,’ उनले भने ।<br><br>पक्राउ परेकालाई परिसरले आइतबार पत्रकार सम्मेलन गरी सार्वजनिक गरेको हो । अभियानका क्रममा सार्वजनिक यातायातमा २ देखि ६ जनासम्मको समूह बनाई बसमा छिर्ने र पैसा भएको व्यक्ति बनाई गोप्य भाषा ९कोड भाषा० प्रयोग गरी घेराबन्दीमा पार्ने र त्यसपछि मोबाइल, नगद तथा सुनचाँदी पकेट मारेर भाग्ने गरेको पाइएको प्रहरीले जनाएको छ ।<br><br>एकजना पाकेटमाराले त आफू प्रहरी हबल्दार भएको भन्दै प्रस्तुत गरेको समेत प्रहरीले जनाएको छ ।<br>पाकेटमाराका कोड भाषा<br>पैसा–द<br>मोबाइल–कान<br>पाकेटकारी पीडित– रामे<br>पाकेटकारी गर्ने (मास्टर)–काशी<br>पैसा धेरै छ–टानको द<br>पैसा थोरै छ–जुटको द<br>गाडी–काचा<br>केटा– छापा<br>केटी– भद्री<br>पुलिस आयो– ठूल्दाइ आयो<br>ड्राइभर–माम<br>खलासी– मले<br>गाडीबाट झरेर भाग–टप्की<br>गाडीभित्र अगााडि सर– अकल जा<br>गाडीभित्र पछाडि सर– चिछल जा<br><br>अभियानका क्रममा पाकेटमारी गर्दै गरेको अवस्थामा विभिन्न व्यक्तिको ६ लाखभन्दा बढी नगद बरामद गरी तत्काल सम्बन्धितलाई फिर्ता गरिएको परिसरका प्रवक्ता होविन्द्र बोगटीले जानकारी गराए । सो क्रममा पाँचथरका नगेन्द्र लिम्बूको २ लाख नगद पाकेट मार्ने क्रममा प्रहरीले रंगेहात पक्राउ गरी लिम्बूलाई फिर्ता गरिसकेको छ।<br><br>बरामद भएको ९३ हजार रकम चोरी मुद्दा चलाई अदालतबाट प्रमाणित गरेर फिर्ता गर्ने क्रममा रहेको जानकारी दिइयो ।<br><br>परिसरका अनुसार कानुनबमोजिम पहिलोपटक पक्राउ पर्नेलाई एक महिना जेल तथा बिगो बराबरको जरिमाना, दोस्रोपटक पक्राउ पर्नेलाई दुई महिना जेल सजाय र बिगो बराबरको जरिमाना वा दुवै सजाय हुने र सार्वजनिक सेवा अवरुद्ध गरेको अभियोगमा मुद्दा चलाइनेछ ।<br></p>