सर्वदलिय बैठक । छलफल सकारात्मक उपलब्धि शुन्य

जेष्ठ ११, २०७३ मा प्रकाशित
Published at 2016-05-24

303 views

११ जेठ, काठमाडौं ।
सरकारले आन्दोलनरत मधेशी मोर्चासंग भइरहेका संवाद र अनौपचारिक छलफलका बारेमा दलहरुलाई जानकारी गराएको छ ।

प्रधानमन्त्री केपी शर्मा ओलीको आव्हानमा आज भएको सर्वदलीय बैठकमा मधेशी मोर्चा उपस्थित नभए पछि प्रमुख प्रतिपक्षि काँग्रेसलगायतका दलहरुलाई वार्ताका लागि भइरहेका प्रयाशकाबारेमा प्रधानमन्त्रीले जानकारी गराउनु भएको हो ।

बैठक पछि नेकपा एमालेका नेता एवं कानून मन्त्री अग्नी खरेलले मधेशी मोर्चासंग छलफल गरेरै आजको बैठक राखिएको भए पनि पछिल्लो समयमा मोर्चाले बैठकमा उपस्थित हुन नसक्ने जानकारी गराएकाले वार्ता र संवादबाट समस्या समाधान गर्नका लागि फेरि छिट्टै बैठक गरिने सहमति भएको बताउनुभयो ।

नेपाली काँग्रेसका नेता महेश आर्चायले मोर्चाका मागका विषयमा अनावश्यक टिकाटिप्पणी गर्नु भन्दा पनि परिणाममुखी वार्ताका लागि सरकारले पहल गर्नुपर्ने र त्यसका लागि सहयोग गर्न काँग्रेस तयार रहेको जानकारी गराएको बताउनुभयो ।

मधेशी जनअधिकार फोरम लोकतान्त्रिकका अध्यक्ष एवं उपप्रधानमन्त्री विजयकुमार गच्छदारले सरकारले वार्तालाई गम्भिरता पूर्वक अघि बढाएकाले आन्दोलनरत मोर्चा वार्तामा आउनु पर्ने बताउनुभयो ।

नेकपा माओवादी केन्द्रका नेता रामबहादुर थापाले समस्यालाई वार्ताबाटै समाधान गर्ने विषयमा प्रमुख प्रतिपक्षिलगायत दलहरुसंग छलफल भएको बताउनुभयो ।

प्रधानमन्त्री ओलीले वार्ताका लागि हिजो मोर्चाका नेताहरुलाई पत्राचार गर्नुभएको थियो ।


प्रतिक्रिया

सम्बन्धित खवर

TopNepalNews copyright © 2021 News. All Rights Reserved. Website by Muncha Developers.