काठमाडौँ । कतारका अमिर (राजा) शेख तमिम विन हमाद अल थानी नेपालको दुई दिने भ्रमणका लागि आज काठमाण्डौ आउँदै हुनुहुन्छ । उहाँ बेलुका बङ्गलादेशको राजधानी ढाकाबाट विशेष विमानमार्फत् काठमाण्डौ अवतरण गर्ने तालिका छ ।

अमिर थानीलाई आज बेलुका त्रिभुवन अन्तर्राष्ट्रिय विमानस्थलमा पुगेर राष्ट्रपति रामचन्द्र पौडेलले स्वागत गर्नुहुने भएको छ । साथै, कतारी अमिरलाई विमानस्थलको अतिविशिष्ट कक्षमा २१ तोपको सलामी दिएर सम्मान गरिनेछ । आजै बेलुका राष्ट्रपति पौडेलसँग थानीको भेटवार्ता हुनेछ । त्यसपछि सोल्टी होटलमा राष्ट्रपति पौडेलले कतारी अमिरको सम्मानमा रात्रिभोज आयोजना गर्नुभएको छ ।

भोलि बिहान कतारी अमिर र प्रधानमन्त्री पुष्पकमल दाहाल प्रचण्डबीच प्रतिनिधिमण्डलस्तरमा द्विपक्षीय भेटवार्ता हुनेछ । कतारसँग २०३३ साल माघमा नेपालको कूटनीतिक सम्बन्ध स्थापना भएयता कतारबाट मात्र नभई खाडी क्षेत्र (मध्यपूर्व)बाटै अहिलेसम्म राष्ट्राध्यक्षको स्तरमा हुन लागेको यो पहिलो नेपाल भ्रमण हो ।

कतार नेपालको महत्वपूर्ण श्रम गन्तव्य देश हो । कतारमा तीन लाख ६८ हजार नेपाली श्रमिक कार्यरत छन् । प्रधानमन्त्री र अमिर थानीबीच भेटवार्तापछि द्विपक्षीय सहकार्यसम्बन्धी आपसी सम्झौतामा हस्ताक्षर हुने कार्यक्रम छ । प्रतिनिधिमण्डलस्तरीय बैठकपछि दुई देशबिच विभिन्न ५ क्षेत्रमा समझदारी हुने परराष्ट्र मन्त्रालयका प्रवक्ता अमृतकुमार राईले जानकारी दिनुभयो । उहाँकाअनुसार उच्च शिक्षा र वैज्ञानिक अनुसन्धान तथा युवा र खेलकुदका विषयमा सहकार्य प्राथमिकतामा छ ।

नेपालले कतारी राजासँग हमास लडाकु समूहको नियन्त्रणमा रहेका कञ्चनपुरका विपिन जोशीको रिहाइका लागि पहल गरिदिन आग्रह समेत गर्ने भएको छ । त्यस्तै नेपालले कतारी राजालाई दुई वटा हात्ती उपहार दिने भएको छ । कतारका राजा भोलि स्वदेश फर्किने कार्यक्रम छ । कतारका राजाको सम्मानका लागि सरकारले आज सार्वजनिक बिदा दिएको छ ।

काठमाडौँ । नेपालमा कम्युनिष्ट पार्टी स्थापना भएको ७५ वर्ष भएको छ । देशमा जहानियाँ राणा शासनको बेला २००६ साल वैशाख १० गते नेकपाको स्थापना भएको थियो । पुष्पलाल श्रेष्ठको नेतृत्वमा भारतको कोलकातामा नीरञ्जन गोविन्द वैद्य, नरबहादुर कर्माचार्य, नारायणविलास जोशी र मोतीदेवी श्रेष्ठ संस्थापक रहेको नेपाल कम्युनिष्ट पार्टी स्थापना भएको थियो ।

स्थापनाकालदेखि नै कम्युनिष्ट पार्टीभित्र विवाद र फुट शुरु भएको थियो । कम्युनिष्टहरू पहिलोपटक २०१७ सालमा राजा महेन्द्रको कदमलाई लिएर विभाजन भएका थिए । त्यसपछि कम्युनिष्ट पार्टीभित्र फुट र विभाजन भैरहेको छ । अहिले संसद् र संसद् बाहिर पनि थुप्रै कम्युनिष्ट पार्टी अस्तित्वमा छन् ।

संसदमा नेकपा एमाले, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चा र नेपाल मजदुर किसान पार्टी छन् । संसद्बाहिर नेत्रविक्रम चन्द विप्लव नेतृत्वको नेपाल कम्युनिष्ट पार्टी, मोहन वैद्य किरण नेतृत्वको क्रान्तिकारी कम्युनिष्ट पार्टी, बाबुराम भट्टराई नेतृत्वको नेपाल समाजवादी पार्टी, गोपाल किराती नेतृत्वको नेपाल कम्युनिष्ट पार्टी (माओवादी)लगायत दर्जनौँ कम्युनिष्ट अस्तित्वमा छन् ।

यसैबीच नेकपा स्थापनाको ७५ वर्ष पूरा भएको अवसरमा सत्तारूढ नेकपा एमालेले हीरक महोत्सव आयोजना गर्दैछ । ललितपुरको गोदावरीमा रहेको सनराइज हलमा आयोजना गर्न लागिएको हीरक महोत्वसमा नेपाली कांग्रेसका सभापति शेरबहादुर देउवालाई पनि निम्तो दिइएको छ ।

यस्तै प्रधानमन्त्री पुष्पकमल दाहाल ‘प्रचण्ड’, पूर्व प्रधानमन्त्रीहरू एकीकृत समाजवादीका अध्यक्ष माधवकुमार नेपाल, सम्मानित नेता झलनाथ खनाल, नेपाल समाजवादी पार्टीका अध्यक्ष बाबुराम भट्टराई लगायतलाई निम्तो दिइएको एमालेले जनाएको छ ।

हीरक महोत्सवमा एमालेले राष्ट्रिय गौरव पदकबाट पूर्वराष्ट्रपति एवम् पूर्वपार्टी उपाध्यक्ष विद्यादेवी भण्डारीलाई सम्मान गर्ने भएको छ । महाधिवेशन प्रतिनिधि परिषद् बैठकले पूर्व राष्ट्रपति भण्डारीलाई राष्ट्रिय गौरव पदकबाट सम्मानित गर्ने निर्णय गरेको हो । देशको लोकतान्त्रिक आन्दोलन, कम्युनिष्ट आन्दोलन पुर्‍याएको योगदान र राष्ट्रिय स्वाभिमान रक्षाका खातिर अडान लिएका व्यक्तिलाई सम्मान गर्ने घोषित योजनाअनुसार हिरक जयन्तीमा पूर्वराष्ट्रपति भण्डारीलाई सम्मान लागिएको एमालेको भनाइ छ ।

काठमाडौँ । शिक्षा तथा मानव स्रोत विकास केन्द्रले राजनीतिक दलको कार्यकारिणी समितिका सदस्य रहेका शिक्षक र कर्मचारीलाई कारबाही गर्न शिक्षा विकास तथा समन्वय इकाईलाई निर्देशन दिएको छ । अघिल्लो हप्ता वैशाख ४ गते शिक्षा, विज्ञान तथा प्रविधि मन्त्रालयको मन्त्रीस्तरीय निर्णयअनुसार केन्द्रले अनुसन्धान गरेर कारबाही गर्न इकाईलाई निर्देशन दिएको हो ।

सामुदायिक विद्यालयमा कार्यरत शिक्षक र कर्मचारीले विभिन्न राजनीतिक दलको सदस्यता लिएको, कार्यकारिणी समितिमा रहेको, महाधिवेशन प्रतिनिधि भएको भन्दै उजुरी परेपछि यसबारे आवश्यक अनुसन्धान गरेर कारबाही गर्न शिक्षामन्त्री सुमना श्रेष्ठले केन्द्रलाई निर्देशन दिनुभएको थियो ।

यसैबमोजिम केन्द्रले इकाइलाई परिपत्र गर्दै अनुसन्धान गरेर कारबाही गर्न भनेको हो । शिक्षा मन्त्रालयको यो निर्णयमा शिक्षक, कर्मचारीका संघ, संगठनले बिरोध गर्दै आएका छन् ।

काठमाडौँ । एक हप्तायता देशभर गर्मी बढेको छ । तराईका विभिन्न ठाउँमा तातो हावा चल्न थालेको छ । धनगढी, नेपालगञ्ज, भैरहवा, सिमरा र जनकपुरको तापक्रम ३८ डिग्री सेल्सियसभन्दा माथि पुगेको छ ।

अझ जनकपुर र भैरहवाको तापक्रम ४० डिग्री सेल्सियसभन्दा पनि धेरै छ । अस्ति शनिवार भैरहवाको तापक्रम ४३ दशमलव ६, नेपालगञ्जको ४२ दशमलव २ र धनगढीको ४२ दशमलव २ डिग्री सेल्सियस पुगेको थियो । हिजो बादल लागेकाले ती ठाउँको तापक्रम थोरै घटे पनि आजदेखि फेरि बढ्ने सम्भावना रहेको मौसमविद् गोविन्द झाले बताउनुभयो ।

तराईका विभिन्न ठाउँमा तातो हावा चलेर तापक्रम ‘लु’ को अवस्थामा पुगे पनि जल तथा मौसम विज्ञान विभागले लु’ चलेको आधिकारिक घोषणा गरिसकेको छैन । सामान्यतया लगातार तीन दिन वा त्योभन्दा धेरै समयसम्म असामान्य रूपमा तापक्रम बढ्दा लु’ चलेको घोषणा गरिन्छ ।

यसको निश्चित मापदण्ड नभए पनि निरन्तर तापक्रम ४० डिग्रीभन्दा माथि पुग्यो भने `लु’ चलेको घोषणा गर्ने गरिएको मौसमविद् झाले उज्यालोलाई जानकारी दिनुभयो । तत्काल पानी पर्ने सम्भावना नभएकाले देशभरको तापक्रम अझ बढ्न सक्ने उहाँको भनाइ छ ।

काठमाण्डौको तापक्रम ३३ दशमलव ५ डिग्री सेल्सियससम्म पुगेको छ । आज पनि बिहानैदेखि गर्मी छ ।

गण्डकी, कर्णाली र सुदूरपश्चिम प्रदेशका पहाडी भूभागका थोरै ठाउँमा तथा कोशी र बागमती प्रदेशको पहाडी भूभागका एक, दुई ठाउँमा मेघगर्जन र चट्याङ्गसहित हल्का वर्षाको सम्भावना रहेको मौसम पूर्वानुमान महाशाखाले जनाएको छ ।

महाशाखाकाअनुसार आज मधेश प्रदेशका केही ठाउँ तथा कोशी र लुम्बिनी प्रदेशका तराई भूभागका थोरै ठाउँमा हावाहुरीको सम्भावना रहेको छ ।

काठमाडौँ । हिजो एकैदिन देशका तीन सय २७ ठाउँको जङ्गलमा डढेलो लागेको छ । वन तथा भू–संरक्षण विभागको वन डढेलो अनुगमन प्रणालीको तथ्याङ्कअनुसार हिजो एकैदिन तीन सय २७ ठाउँको जङ्गलमा डढेलो लागेको हो ।

अहिले पनि देशका दुई सय एक ठाउँमा सक्रिय डढेलो देखिएको छ । अहिले सुर्खेतको २६, बाँकेको २०, सल्यान, दाङ र डडेल्धुराको १८/१८ ठाउँसहित देशका २८ वटा जिल्लाका दुई सय एक ठाउँमा सक्रिय डढेलो रहेको हो । अहिले विशेषगरी लुम्बिनी प्रदेशसहित पश्चिम तराईका जिल्लामा डढेलो धेरै देखिएको छ ।

डढेलोका कारण देशभरको वायु प्रदुषण पनि बढेको छ । कतिपय ठाउँमा डढेलो बस्तीमा पुगेको छ । हावाहुरीका कारण डढेलो तिब्र गतिमा फैलिएको छ । दक्ष जनशक्तिको अभाव र आधुनिक उपकरण नहुँदा नेपालमा डढेलो निभाउन समस्या हुने गरेको छ ।

स्थानीयबासिन्दा र सुरक्षाकर्मीले डढेलो बस्तीमा पस्नबाट जोगाउने प्रयास गरे पनि डढेलो निभाउन मुस्किल छ । नेपालको भौगोलिक अवस्था र यहाँ हुने डढेलोको जोखिमका कारण डढेलो नियन्त्रणका लागि फायर फाइटिङ हेलिकोप्टर अनिवार्य भएको डढेलोबारे अध्ययन गर्नुभएका डाक्टर भूपेन्द्र दास बताउनुहुुन्छ ।

काठमाडौँ । गोरखाको चुमनुब्री गाउँपालिका–१ मा रहेको वीरेन्द्र हिमताल फुटेको छ ।

मनास्लु हिमालको बेसक्याममा हिमपहिरो गएर वीरेन्द्र तालमा मिसिँदा ताल फुटेर सामागाउ प्रहरी चौकाका असई अन्जान पोखरेलले जानकारी दिए ।

हिमताल फुटेपछि त्यहाँको स्थानीय खहरेमा ठूलो बाढी आएको छ । बाढीका कारण एउटा काठको पुल बगाएको र कुनै मानवीय क्षति भने नभएको पोखरेलको भनाइ छ ।

ताल रहेको क्षेत्र चुमनुब्री–१ पर्छ । प्रहरी टोली घटनास्थलतिर गएको उनको भनाइ छ ।

त्यो बाढी बुढीगण्डकीमा मिसिने भएकोले तटीय क्षेत्रमा रहेका बासिन्दालाई सचेत हुन प्रहरीले सुझाएको छ ।

काठमाडौँ । सरकारले सञ्चालन गरेको घटना दर्ता अभियानअन्तर्गत पञ्जिकरण सम्बन्धी २३ हजार जनाभन्दा धेरै घटना दर्ता भएका छन् ।

वैशाख १ गतेदेखि हिजोसम्म सञ्चालन गरेको अभियानअन्तर्गत १४ हजार एक सय ६९ जन्म, चार हजार एक सय छ वटा विवाह, तीन सय १० वटा सम्बन्धविच्छेद, एक हजार आठ सय ५० बसाइँसराइ र दुई हजार आठ सय ४१ मृत्यु गरी २३ हजार दुई सय ७६ वटा घटना दर्ता भएका पञ्जीकरण शाखाका निर्देशक दिलकुमार तामाङले जानकारी दिनुभयो ।

वैशाखको पहिलो हप्तामा सचेतनाका लागि अभियान सञ्चालन गरे पनि कार्यालय खुल्ने दिनमा सधैंभरी घटना दर्ता गर्न सकिने तामाङले बताउनुभयो ।

यसैबीच कानुनी पहिचान नहुँदा धेरै सडक बालबालिकाको घटना दर्ता हुन सकेको छैन । उनीहरुको घर तथा अभिभावकको पहिचान नहुँदा घटना दर्ता गराउन समस्या रहेको सडक बालबालिको क्षेत्रमा काम गर्ने गैरसरकारी संस्था ‘साथसाथ’ ले जनाएको छ ।

सडक बालबालिकाको जन्मदर्ता गराउनका लागि पालिकाबाट पहल गरिरहेको भए पनि कानुनी पहिचान दिलाउन समस्या रहेको संस्थाका कार्यक्रम व्यवस्थापक कविता शाहले बताउनुभयो । नागरिकता सम्बन्धी ऐन २०६३ (पहिलो संशोधन २०७९) जारी भएपछि एकल महिलालाई नागरिकता बनाउन सजिलो भए पनि बाबु आमा दुबैको पहिचान नभएका सडक बालबालिकाका लागि पहिचान गर्ने व्यक्ति नहुँदा कठिनाइ रहेको छ । अभिभावकविहीन बालबालिका कति छन् भनेर सरकारसँग पनि यकिन विवरण छैन ।

काठमाडौँ । आज दिउँसोपछि बाग्मती, गण्डकी, लुम्बिनी र कर्णाली प्रदेशका केही ठाउँमा हावाहुरीको सम्भावना रहेको मौसम पूर्वानुमान महाशाखाले जनाएको छ । विशेषगरी पश्चिमी क्षेत्रका केही ठाउँमा हुरीबतास चल्न सक्ने सम्भावना देखिएको हो । त्यस्तै काठमाण्डौ उपत्यकामा पनि सामान्य हावाहुरी चल्न सक्ने महाशाखामा मौसमविद् मिनकुमार अर्यालले जानकारी दिनुभयो ।

मौसमविदका अनुसार काठमाण्डौ उपत्यकामा तापक्रम ३०/३१ डिग्री सेल्सियससम्म रहने र तल्लो वायुमण्डलमा तातो र ओसिलो हावाबीचको सम्मिश्रणका कारण हावाहुरीको जोखिम देखिन्छ । वर्खा शुरु हुनुभन्दा अघि चैत, वैशाख र जेठसम्मको समयमा प्रि–मनसुनी गतिविधि हुन्छन् । यो बेला मेघगर्जनसहित पानी पर्ने, चट्याङ पर्ने, हावाहुरी चल्ने हुन्छ ।

अहिले देशभर पश्चिमी वायु र स्थानीय वायुको आंशिक प्रभाव छ । मौसम पूर्वानुमान महाशाखाका अनुसार अहिले देशका पहाडी केही क्षेत्रमा मौसम आंशिक बदली छ । बाँकी भागमा मौसम सफा नै छ ।

आज दिउँसो कोशी, बाग्मती, गण्डकी र कर्णाली प्रदेशका पहाडी क्षेत्रमा आंशिक बदलीको सम्भावना छ । एक–दुई ठाउँमा मेघगर्जन र चट्याङसहित हल्का वर्षाको सम्भावना रहेको महाशाखाले जनाएको छ ।