बैंकिङ कसूरका फरार प्रतिवादी पक्राउ

काठमाडौँ । महानगरीय प्रहरी परिसरले बैंकिङ कसूरका फरार प्रतिवादीलाई पक्राउ गरेको छ ।

पक्राउ पर्नेमा जनकपुरधाम उप-महानगरपालिका-८ घर भई काठमाडौंको बानेश्वर-१० मा बस्‍दै आएका ४९ वर्षीय कमल कुमार सिंह रहेका छन् ।

उच्च अदालत पाटनको २०७७ पुस १५ गतेको आदेश अनुसार सिंहले १५ लाख धरौटी बुझाउन नसक्‍दा डिल्लीबजार कारागारमा जेल चलान गरिएको थियो ।

महाराजगञ्जबाट खटिएको प्रहरीले सिंहलाई काठमाडौंको काँडाघारीबाट शुक्रबार पक्राउ गरेको जनाएको छ ।

सिंहले आफ्नो खातामा पर्याप्त मौज्दात रकम नभएको भन्‍ने जानी जानी झुक्याएर एक जनालाई ६० लाख र अर्को एक जनालाई ६१ लाख बराबरको चेक भुक्तान हुने गरी दिएका थिए ।

पक्राउ परेका सिंहलाई शुक्रबार उच्चअदालत पाटट ७ दिनको म्‍याद लिइ थप अनुसन्धान भइरहेको महानगरीय प्रहरी परिसरले जनाएको छ । साथै सिंहले अन्य ब्यक्तिहरुलाईसमेत पीडित बनाएको हुन सक्ने भन्‍दै उजुरी गर्नसमेत आग्रह गरेको छ ।

फेसबुकबाट महिलालाई धम्की दिने युवक पक्राउ

काठमाडौँ । नेपाल प्रहरीको साइबर ब्‍यूरोले विद्युतीय कारोबार ऐनअन्तर्गत फरार रहेका प्रतिवादीलाई पक्राउ गरेको छ ।

पक्राउ पर्नेमा कास्की रुपा गाउँपालिका-७ सिस्नेरी बस्‍ने ३१ वर्षीय मुक्ति खनाल रहेका छन् ।

उनलाई वैदेशिक रोजगारबाट फर्कने क्रममा शुक्रबार त्रिभुवन अन्तर्राष्ट्रिय विमानस्थलबाट पक्राउ गरेको हो।

पक्राउ परेका उनीमाथि थप अनुसन्धान भइरहेको ब्‍यूरोले जनाएको छ ।

उनले वैदेशिक रोजगारीमा रहँदा फेसबुकमा महिलालाई साथी बनाई उनको नग्न तस्वीर सार्वजनिक गरिदिने धम्की दिएको प्रहरीको भनाइ छ ।

कार्यालय समयमा मोबाइल चलाउन नपाउने

काठमाडौँ । त्रिभुवन विमानस्थल अध्यागमन कार्यालयमा खटिएका कर्मचारीले कार्यालय समयमा मोबाइल चलाउन नपाउने भएका छन् ।

त्रिभुवन विमानस्थल अध्यागमन कार्यालयले आज शुक्रवार सूचना निकालेर अराइभल कक्ष र डिपार्चर कक्षमा खटिएका कर्मचारीलाई कार्यालय समयमा ल्यान्डलाइन र अफिसियल मोबाइल मात्र प्रयोग गरी अध्यागमनको काम गर्न कार्यालयले निर्देशन दिएको छ ।

मोबाइल चलाएको या नचलाएकोबारे अध्यागमन अधिकृतले अनुगमन गर्नुपर्ने र मोबाइलको व्यक्तिगत प्रयोगको मात्रालाई नियन्त्रण तथा नियमन गर्नुपर्ने सूचनामा भनिएको छ । अत्यावश्यक काम परेको अवस्थामा भने वरिष्ठ अध्यागमन अधिकृतलाई जानकारी गराइ स्वीकृति भएपछि मात्र प्रयोग गर्न पाइने भएको छ । कर्मचारीले सम्पूर्ण व्यक्तिगत मोबाइल आफ्नो लकरमा राख्नुपर्ने छ ।

७० प्रतिशतले पाए कोरोनाको पूर्ण खोप

काठमाडौँ । सरकारले नेपालमा १८ वर्षभन्दा माथि उमेर समूहका ७० प्रतिशत नागरिकले कोरोना भाइरसविरुद्धको पूर्णमात्रा खोप पाएको दावी गरेको छ ।

शुक्रबार स्वास्थ्य तथा जनसंख्यामन्त्री विरोध खतिवडाले विज्ञप्ति जारी गरी १८ वर्षमाथिका ७० प्रतिशतले पूर्ण र ८३ प्रतिशत नागरिकले कम्तीमा एक मात्रा खोप लगाएको बताएका छन् ।

त्यस्तै, १२ वर्षदेखि १७ वर्षसम्मका १८ लाख ७२ हजार ६७० बालबालिकाले पहिलो मात्रा र तीन लाख ५८ हजार २९८ बालबालिकाले पूर्ण मात्रा खोप लगाएका उनले जानकारी दिए । कोरोना महामारीविरुद्ध अग्रपंक्तिमा खटिएकामध्ये तीन लाख जनाले बुस्टर डोज खोप पाएका छन् ।

हालसम्म नेपालमा कोरोना भाइरसविरुद्धको चार करोड २० लाख ४९ हजार ६४० डोज खोप आइपुगेकामा तीन करोड छ लाख चार हजार १५२ डोज खोप नगाइसकेको पनि मन्त्री खतिवडाले जानकारी दिएका छन् ।

नेपालमा कोरोना भाइरसविरुद्धको खोप लगाउन सुरु गरेको शुक्रबार एक वर्ष पूरा भएको छ ।

६ हजार ८ सय २७ जनामा कोरोना पुष्टि

काठमाडौँ । पछिल्लाे २४ घण्टामा नेपालमा ६ हजार आठ सय २७ जनामा काेराेना सङ्क्रमण पुष्टि भएकाे छ । पीसीआर र एन्टिजेन गरी १९ हजार आठ सय ६९ जनाकाे नमुना परीक्षण गर्दा ६ हजार आठ सय २७ जनामा सङ्क्रमण पुष्टि भएकाे स्वास्थ्य मन्त्रालयले जनाएकाे छ ।

यस्तै थप पाँच हजार चार सय ३२ जना निकाे भएसँगै काेराेना सङ्क्रमणमुक्त हुनेकाे सङ्ख्या आठ लाख ४२ हजार चार सय ३६ पुगेकाे छ । नेपालमा अहिले ८९ हजार नाै सय ४१ जना काेराेनाका सक्रिय सङ्क्रमित रहेकाे छन् ।

२४ घण्टामा १० जना सङ्क्रमितकाे ज्यान गएसँगै काेराेना सङ्क्रमणबाट ज्यान गुमाउनेकाे सङ्ख्या ११ हजार ६ सय ९७ पुगेकाे मन्त्रालयले जनाएकाे छ ।

यसैबीच २४ घण्टामा एक लाख २८ हजार ६ सय ६३ जनाले कोरोनाविरुद्धको खोप लगाएका छन् । योसहित नेपालमा तीन करोड ६ लाख ४ हजार १ सय ५२ मात्रा खोपको प्रयोग भएकाे छ । यसमा एक करोड ६४ लाख ७४ हजार पाँच सय १४ जनाले पहिलो मात्रा र एक करोड ३८ लाख ३३ हजार ६ सय २९ जनाले पूर्ण मात्रा र दुई लाख ९६ हजार नाै जनाले अतिरिक्त खोप लगाएका मन्त्रालयले जनाएको छ ।

गैँडा मरेको घटनामा ठेकेदारविरुद्ध पक्राउ पूर्जी

चितवन । गएको माघ ९ गते भरतपुरको गोन्द्राङमा निर्माणाधीन सडकको नालीमा परेर गैँडा मरेको घटनामा ठेकेदारविरुद्ध पक्राउ पूर्जी जारी भएको छ ।

सडकको नाली लापरबाहीपूर्ण तरिकाले छाड्दा गैँडा मरेको घटनामा चितवन राष्ट्रिय निकुञ्जले इण्डो सगुन जेभीका सञ्चालक सहदेव खड्काविरुद्ध पक्राउ पूर्जी जारी गरेको हो । उनीविरुद्ध बिहीबार नै पक्राउ पूर्जी जारी गरिएको भए पनि हालसम्म पक्राउ परेका छैनन् ।

निकुञ्जका सूचना अधिकारी गणेशप्रसाद तिवारीका अनुसार निकुञ्जले अनुसन्धान अधिकृत तोकेर काम अगाडि बढाएसँगै ठेकेदार कम्पनीका सञ्चालक खड्कालाई पक्राउ पूर्जी जारी गरिएको बताए । खड्काले नारायणगढ गोन्द्राङ लेनको सडक विस्तार र भरतपुरमा सिटी हल बनाइरहेका छन् । निकुञ्जले सहायक संरक्षण अधिकृत राजु घिमिरेलाई अनुसन्धान अधिकृत तोकेको छ ।

वन तथा वातावरण मन्त्रालयले समेत वन विभागका उपमहानिर्देशक डा. राजेन्द्र केसीको संयोजकत्वमा पाँच सदस्यीय छानबीन समिति गठन गरेको छ । समितिले १० दिनभित्र प्रतिवेदन बुझाउनुपर्ने हुन्छ ।

डिभिजन सडक कार्यालय चितवनले पुल्चोकदेखि गोन्द्राङसम्म ६ लेन सडकका लागि ठेक्का लगाएको थियो । सडकले वन्यजन्तु करिडोरमा निर्माण गर्दा पालना गर्नुपर्ने ऐन कानून अवलम्बन नगरी काम गर्दा घटना भएको निकुञ्जले जनाएको छ ।

बेलायतको राजदूतमा आचार्य नियुक्त

काठमाडौँ । राष्ट्रपति विद्यादेवी भण्डारीले ज्ञानचन्द्र आचार्यलाई बेलायतको राजदूतमा नियुक्त गरेकी छिन् ।

मन्त्रिपरिषद्‌को सिफारिसमा राष्ट्रपति भण्डारीले शुक्रबार आचार्यलाई बेलायतको राजदूतमा नियुक्त गरेकी हुन् ।

सचिवबाट अवकाश पाएका आचार्य यसअघि संयुक्त राष्ट्रसंघको स्थायी प्रतिनिधि भएर काम गरेका व्यक्ति हुन् । शेरबहादुर देउवाले नै २०७४ सालमा प्रधानमन्त्री हुँदा आचार्यलाई प्रमुख आर्थिक सल्लाहकार बनाएका थिए ।

सुनको भाउ ९ सय रुपैयाँले घट्यो

काठमाडौँ । सुनको भाउ आज पनि तोलामा ९ सय रुपैयाँले घटेको छ ।

हिजो र आज सुन लगातार तोलामा ९ सय रुपैयाँले घटेको हो ।

आज सुनको भाउ तोलाको ९२ हजार ६ सय रुपैयाँ कायम गरिएको नेपाल सुन चाँदी व्यवसायी महासङ्घले जनाएको छ ।

अस्ति बुधवार तोलाको ९४ हजार ४ सय रुपैयाँमा कारोबार भएको सुन हिजाे बिहीवार ९ सय रुपैयाँले घटेर तोलाको ९३ हजार ५ सय रुपैयाँमा कारोबार भएको थियो ।

यस्तै आज चाँदीको भाउ पनि घटेको छ । हिजो तोलाको १२ सय ९० रुपैयाँमा कारोबार भएको चाँदीको भाउ आज २५ रुपैयाँले घटेर १२ सय ६५ रुपैयाँ तोकिएको महासङ्घले जनाएको छ ।

सेना र लागुऔषध तस्करबीच झडप हुँदा २७ जनाको मृत्यु

काठमाडौँ । जोर्डनमा सेना र लागुऔषध तस्करबीच झडप हुँदा २७ जनाको ज्यान गएको छ ।

सिरियाबाट भित्रिएका लागुऔषध तस्करलाई पक्राउ गर्न सेनाले चलाएको गोली लागेर उनीहरुको ज्यान गएको अन्तर्राष्ट्रिय सञ्चारमाध्यमले जनाएका छन् ।

भारी हिमपात भइरहेका बेलामा सिरियाबाट जोर्डन प्रवेश गर्न खोजिरहेका तस्करलाई रोक्न खोज्दा गोली चलेको जोर्डनको सुरक्षा निकायले विज्ञप्ति निकालेर जनाएको छ ।

घटनापछि ठूलो मात्रामा लागुऔषध फेला पारेको सेनाकाे दाबी छ ।

लागूऔषध गाँजासहित चार जना पक्राउ

पर्सा । पर्सा प्रहरीले लागूऔषध गाँजासिहत चारजनालाई पक्राउ गरेको छ ।

पक्राउ पर्नेमा बहुदरमाइ नगरपालिका-९ का विश्रामपुरका ६० वर्षीय गणेश साह कलवार, बहुदरमाइकै ३४ वर्षीय सन्तोष साह कलवार, सखुवाप्रसौनी गाउँपालिका-१ का ३५ वर्षीय सुरेश दास र भारत विहार मोतिहारीका ४२ वर्षीय दसाही दास रहेका छन् ।

विशेष सूचनाको आधारमा पर्सा प्रहरीले गणेश साह कलवारको घरबाट उनीहरुलाई पक्राउ गरेको हो ।

प्रहरीले गणेश साह र सन्तोष साह कलवारबाट ७४/७४ केजी तथा सुरेस दास र दसाही दासबाट ७/७ केजी लागू औषध गाँजा बरामद गरेको छ ।

पक्राउ परेका उनीहरुमाथि इलाका प्रहरी कार्यालय पोखरियाबाट लागू औषध सम्बन्धी कसूरमा अनुसन्धान भइरहेको जिल्ला प्रहरी कार्यालय पर्साले जनाएको छ ।

प्र्याङ्क भिडियो खिचे कारबाही गर्ने चेतावनी

काठमाडौँ । गृहमन्त्रालयले प्र्याङ्क भिडियो खिचेर सामाजिक सञ्जालमा प्रकाशन गर्नेलाई कारबाही गर्ने चेतावनी दिएको छ ।

मन्त्रालयले बिहीबार विज्ञप्ति जारी गर्दै सार्वजनिक स्थलमा सम्बन्धित व्यक्तिको अनुमतिबिना प्र्याङ्क भिडियो खिचेर सामाजिक सञ्जालमा प्रकाशन गर्नेलाई कारबाही गर्ने चेतावनी दिएको हो ।

विज्ञप्तिमा भनिएको छ, ‘…सार्वजनिक स्थलमा कुनै व्‍यक्तिको अनुमतिबिना कुनै प्रकारको तस्वीर लिन सामाजिक सञ्जालमा प्रकाशन गर्न, व्‍यक्तिलाई जानकारी नै नदिई सम्बन्धित व्‍यक्तिको अनुमति/सहमति बिना कुनै पनि प्रकारको भिडियोग्राफी गरी सामाजिक सञ्जालमा प्रकाशन गर्ने क्रियाकलापमा संलग्न जोसुकैलाई प्रचलित कानुन बमोजिम कारबाही हुने व्‍यहोरा सम्बन्धित सबैमा जानकारीको लागि अनुरोध छ।’

कांग्रेस केन्द्रीय कार्यसमितिको बैठक शुक्रवार

काठमाडौँ । पाली कांग्रेसका सभापति एवम् प्रधानमन्त्री शेरबहादुर देउवाले भोलि शुक्रवार ३ बजेका लागि केन्द्रीय कार्यसमितिको बैठक बोलाउनुभएको छ ।

बैठक भर्चुअल माध्यमबाट बस्नेछ । कोरोना महामारीका कारण भर्चुअल माध्यमबाट बैठक बस्न लागेको हो । बैठकमा राष्ट्रिय सभा चुनावको समीक्षासँगै स्थानीय चुनावबारे छलफल हुने कांग्रेसले जनाएको छ ।

बैठकमा कार्यसम्पादन समिति गठनबारे पनि छलफल हुने मुख्य सचिव कृष्णप्रसाद पौडेलले बतानुभयो ।

TopNepalNews copyright © 2021 News. All Rights Reserved. Website by Muncha Developers.