नुवाकोट ट्राफिक प्रहरीको आयोजनामा १५० जना चालकको स्वास्थ्य परीक्षण

त्रिशूली । जिल्ला ट्राफिक प्रहरी कार्यालय नुवाकोटको आयोजनामा १५० जना सवारी चालकको निशुल्क स्वास्थ्य परीक्षण गरिएको छ ।

ट्राफिक प्रहरी कार्यालय नुवाकोटको आयोजनामा सापकोटा मेडिकल हल तथा पोलिक्लिनिक र पूजा चस्मा पसलको  प्राबिधिक सहयोगमा सवारी चालक तथा सह-चालकलाई लक्षित गरी आयोजना गरेको स्वास्थ्य परीक्षण शिविरमा १ सय ५० जना चालक तथा सहचालकको स्वास्थ्य परीक्षण गरिएको हो ।
नुवाकोटको बिदुर नगरपािलका वडा नं २ बिदुरस्थित ट्राफिक प्रहरी कार्यालय भवन अगाडी स्वास्थ्य परीक्षण तथा परामर्श शिविर संचालन गरेर चालक र सहचालकको स्वास्थ्य परीक्षण गर्नुका साथै उनीहरुलाई विभिन्न प्रकारका रोगबाट बच्न परामर्श दिईएको जिल्ला ट्राफिक प्रहरी कार्यालय नुवाकोटका प्रमुख, वरिष्ठ प्रहरी नायब निरीक्षक गुणनिधी खकुरेलले बताउनुभएको छ ।

परीक्षणका क्रममा जाँच गराउन आएका ब्यक्तिहरुमा उच्च रक्तचाप र आँखामा समस्या देखिएको जिल्ला ट्राफिक प्रहरी कार्यालय नुवाकोटले जनाएको छ । लामो तथा छोटो दुरीका सवारी चालकहरुलाई समय अभावका कारण नियमित स्वास्थ्य परीक्षणमा समस्या देखिरहेको समयमा ट्राफिक प्रहरी आफैले निशुल्क स्वास्थ्य शिविरको आयोजना गर्दा उनीहरुलाई प्रत्यक्ष लाभान्बित भएका छन् ।

तस्वीर सौजन्य : जिल्ला ट्राफिक प्रहरी कार्यालय, नुवाकोट ।

No description available.

No description available.

No description available.

No description available.

गोसाइँकुण्डबाट फर्कनेक्रममा लेक लागेर बेहोस भएका तीन जनाको सकुशल उद्धार

रसुवा । रसुवाको गोसाइँकुण्ड गाउँपालिका–५ गोसाइँकुण्ड तीर्थबाट घर फर्कनेक्रममा लेक लागेर बेहोस भएका तीन जनाको सकुशल उद्धार गरिएको छ ।

मेला सकेर घर फर्कने क्रममा हिजो लेक लागेर बेहोस भएका तीन जनाको सशस्त्र प्रहरीले सकुशल उद्धार गरेको हो ।

नुवाकोट ककनी गाउँपालिका–८ बस्ने ४५ वर्षीय नारायण भण्डारी, विदुर नगरपालिका–११ बस्ने २० वर्षीया साधना प्याकुरेल र धादिङको निलकण्ठ नगरपालिका–३ बस्ने १० वर्षीय निर्जीव दुवाडीको उद्धार गरिएको सशस्त्र प्रहरीले जनाएको छ ।

सशस्त्र प्रहरी बल नेपाल नम्बर २० गुल्म रसुवाबाट गएको टोलीले उनीहरुलाई पिठ्यूँमा बोकी धुन्चे अस्पताल ल्याउने क्रममा उनीहरुको स्वास्थ्यमा सुधार आएको र पछि आफन्तको जिम्मा लगाएर पठाइएको थियो । जनैपूर्णिमा पर्वका अवसरमा स्नानका लागि पवित्र तीर्थ रसुवाको गोसाइँकुण्ड पुगेका भक्तजन फर्कन थालेका छन् ।

जिल्ला प्रहरी कार्यालय रसुवाका प्रहरी निरीक्षक झलक शर्मा पौडेलका अनुसार गोसाइँकुण्ड गएका केही सामान्य बिरामी भएका थिए । गोसाइँकुण्ड क्षेत्र विकास समितिका अध्यक्ष सञ्जीव डीएमका अनुसार यसवर्ष झण्डै १० हजार भक्तजनले गोसाइँकुण्ड दहमा स्नान तथा पूजा आराधना गरी गन्तव्यतर्फ फर्किन थालेका हुन् ।

कांग्रेसको निर्वाचित केन्द्रित अभियान सर्‍यो

काठमाडौँ । नेपाली कांग्रेसको निर्वाचन केन्द्रित राष्ट्रव्यापी अभियान सरेको छ ।

भदौ २ गतेदेखि २४ गतेसम्मका लागि तय भएको अभियान ८ दिन छोट्याएर १० गतेलाई सारिएको हो ।

पार्टी केन्द्रीय कार्यालय सानेपामा शनिबार बिहान बसेको बैठकले अभियानलाई छोट्याएर केही दिन पछि सार्ने निर्णय गरेको हो ।

१० गतेदेखि सुरु भए पनि अभियान २४ गते नै सकिनेछ ।

भदौ महिनामै पार्टीबाट निर्वाचित भएका जनप्रतिनिधिहरूका लागि अभिमुखीकरण कार्यक्रम आयोजना गरिएकोले निर्वाचित केन्द्रित कार्यक्रमलाई छोट्याइएको हो ।

कांग्रेसका जनप्रतिनिधिको अभिमुखीकरण कार्यक्रम ३० र ३१ गते हुँदैछ ।

वेस्ट इन्डिजसँगको टी–२० शृङ्खला न्युजिल्यान्डलाई

काठमाडौँ । घरेलु टोली वेस्टइन्डिजसँगको तीन खेलको टी–२० क्रिकेट शृङ्खला न्युजिल्यान्डले एक खेल अगाडि नै जितेको छ ।

दोस्रो टी–२० मा वेस्टइन्डिजलाई ९० रनले हराउँदै न्युजिल्यान्डले शृङ्खला २–० ले जितेको हो ।

जितका लागि २ सय १६ रनको विजयी लक्ष्य पछ्याएको वेस्टइन्डिजले निर्धारित २० ओभरमा ५ विकेट गुमाउँदै १ सय २५ रन मात्रै बनायो । वेस्टइन्डिजका ओबेद म्याककोय सर्वाधिक २३ रनमा अविजित रहे । न्युजिल्यान्डका मिचेल सान्टनार र माइकल ब्रेसवेलले ३/३ विकेट लिए ।

टिम साउथी र इश सोधीले एक/एक विकेट लिए । त्यसअघि सविना पार्कमा टस जितेर पहिला ब्याटिङ गरेको न्युजिल्यान्डले निर्धारित २० ओभरमा ५ विकेट गुमाउँदै २ सय १५ रन बनाएको थियो । न्युजिल्यान्डका ग्लेन फिलिप्सले सर्वाधिक ७६ रन बनाए ।

वेस्टइन्डिजका ओबेद म्याकोयले ३ विकेट लिए । रोमारियो शेफर्ड र ओडेन स्मिथले एक/एक विकेट लिए । पहिलो खेलमा न्युजिल्यान्ड १३ रनले विजयी भएको थियो । तेस्रो खेल आइतवार हुनेछ । त्यसपछि यी दुई देशबीच तीन खेलको एकदिवसीय शृङ्खला हुनेछ ।

महाकाली नदीमा बगेर २ किशोरी बेपत्ता

काठमाडौँ । महाकाली नदीमा बगेर शुक्रबार बैतडीका दुई किशोरी बेपत्ता भएका छन् । बेपत्ता हुनेमा दशरथचन्द नगरपालिका–८ का १६ वर्षीया कविता टमटा र १५ वर्षीया सङ्गीता टमटा रहेको बैतडीका सहायक प्रमुख जिल्ला अधिकारी खगेन्द्र भारतीले जानकारी दिए ।

शुक्रबार दिउँसो एक बजे नहाउने क्रममा महाकाली नदीस्थित नगतडीबाट बेपत्ता भएका भए पनि प्रहरी र प्रशासनलाई भने बेलुका खबर गरिएको जनाइएको छ ।

किशोरी बेपत्ता भएका खबर पाउनासाथ सुरक्षा निकाय परिचालन गरिएको छ । घटनाबारे बुझ्नका लागि सहायक प्रमुख जिल्ला अधिकारी खगेन्द्र भारतीसमेत घटनास्थलतर्फ गएका छन् ।

प्रसिद्ध उपन्यासकार सलमान रुस्दीमाथि न्युयोर्कमा आक्रमण

काठमाडौँ । विश्व प्रसिद्ध उपन्यासकार सलमान रुस्दीमाथि आक्रमण भएको छ ।

अमेरिकाको न्युयोर्कमा एक कार्यक्रममा मञ्चमा बसिरहेका बेला रुस्दीलाई छुरा प्रहार गरिएको हो । उहाँको घाँटीमा छुरा हानिएको न्युयोर्क प्रहरीलाई उद्धृत गरी अन्तर्राष्ट्रिय सञ्चारमाध्यमले जनाएका छन् ।

रुस्दीलाई हेलिकप्टरबाट तत्कालै नजिकैको अस्पतालमा लगिएको छ । उहाँको भेन्टिलेटरमा उपचार चलिरहेको र बोल्न नसक्ने अवस्था रहेको अस्पताललाई उद्धृत गरी बीबीसीले जनाएको छ । आक्रमणकारीलाई प्रहरीले पक्राउ परेको छ ।

भारतमा जन्मिएका उपन्यासकार रुस्दी सन् १९८१ मा प्रकाशित कृति ‘मिडनाइट चिल्ड्रेन’बाट चर्चित हुनुभएको हो । ७५ वर्षीय रुस्दीले अहिलेसम्म चार वटा पुस्तक लेख्नुभएको छ । सन् १९८८ मा लेखेको ‘द सटानिक भर्सेस’का कारण उहाँ नौ वर्षसम्म भूमिगत हुनुपरेको थियो ।

पुस्तक प्रकाशित भएको एक वर्षपछि इरानका तत्कालीन सर्वोच्च नेता अयोतोल्लाह रुहोल्लाह खोमिनीले रुस्दीको हत्या गर्न आह्वान गरी उहाँको टाउकाेको मूल्य ३० लाख अमेरिकी डलर तोकिएको थियो।

कार्यदलले काम थाले पनि तत्काल घर नफर्कने मिटरब्याजी पीडितको अडान

काठमाडौँ । मिटरब्याजी पीडितहरुले सरकारी कार्यदलमा आफूहरुको पनि प्रतिनिधित्व हुनुपर्ने माग गरेका छन् ।

सरकारले माग पूरा गर्न भन्दै कार्यदल गठन गरे पनि आफूहरु विश्वस्त हुन नसकेको उनीहरुको भनाइ छ । यसअघि पनि सरकारले माग पूरा गर्ने आश्वासन दिएको, तर पूरा नभएको भन्दै अब त्यत्तिकै घर नफर्कने उनीहरुले अडान लिएका छन् ।

काठमाण्डौमा धर्ना बसेका नवलपरासीका मिटरब्याजी पीडितहरुसँग सरकारी कार्यदलले हिजो वार्ता गरेको थियो । कार्यदलले प्रमाण सङ्कलन र अनुसन्धान अगाडि बढाउने आश्वासन दिँदै घर फर्किन आग्रह गरे पनि पीडितहरूले यसअघि पनि सरकारसँग सम्झौता गरेर फर्किँदा धोका भएको भन्दै अहिले त्यतिकै घर नफर्किने अडान लिएका हुन् ।

नेपाली राष्ट्रिय क्रिकेट टोलीको केन्या भ्रमण तालिका सार्वजनिक

काठमाडौँ । नेपाली राष्ट्रिय क्रिकेट टोलीले केन्यासँग खेल्ने ५ खेलको टी–२० र ३ खेलको एकदिवसीय शृङ्खलाको तालिका सार्वजनिक भएको छ ।

नेपाल र केन्याबीच सुरुमा ५ खेलको टी–२० र त्यसपछि एकदिवसीय खेल हुनेछ ।

शृङ्खलाका लागि नेपाली टोली भदौ ७ मा केन्या पुग्ने तालिका रहेको छ । ५ खेलको टी–२० शृङ्खला भदौ ९ गतेदेखि १४ गतेसम्म हुनेछ । त्यस्तै ३ खेलको एकदिवसीय शृङ्खला भदौ १७ देखि २० गतेसम्म हुनेछ । यी खेल नैरोबीमा रहेकाे जिमखाना मैदानमा हुनेछन् ।

यसैबीच राष्ट्रिय क्रिकेट टोलीका नवनियुक्त प्रशिक्षक भारतीय पूर्व क्रिकेटर मनोज प्रभाकर आज नेपाल आउँदैछन् । उनी बेलुका काठमाण्डौ आइपुग्ने नेपाल क्रिकेट सङ्घ क्यानले जनाएको छ ।

देशभरको मौसम बदली, वाग्मती र कर्णालीका केहि ठाउँमा ठूलो पानी पर्ने सम्भावना

काठमाडौँ । आज देशभरको मौसम बदली रहेको छ । आज, भोलि र पर्सि मौसम बदली रही धेरैजसो ठाउँमा हल्कादेखि मध्यम वर्षाको सम्भावना रहेको छ ।

आज वाग्मती र कर्णाली प्रदेशका एक/दुई ठाउँमा ठूलो पानी सम्भावना रहेको जल तथा मौसम पूर्वानुमान महाशाखाले जनाएको छ । अहिले मनसुन न्यून चापीय रेखा नेपालको तराई पूर्वतर्फ सरदर स्थानको आसपास तथा पश्चिमतर्फ सरदर स्थानभन्दा दक्षिणमा रहेको छ ।

मनसुन सुरु भएपछि अहिलेसम्म देशका धेरै ठाउँमा सरदर वर्षा भएको छ । यो वर्ष जेठ १८ देखि साउन २६ अर्थात् जुन १ देखि अगष्ट ११ सम्म ८ सय ५८ दशमलव पाँच मिलिमिटर वर्षा भएको छ । मौसम पूर्वानुमान महाशाखाका मौसमविद् बिनु महर्जनका अनुसार अहिलेसम्म विशेषगरी देशका पहाडी भेगमा बढी वर्षा भएको तथा तुलनात्मक रूपमा तराई क्षेत्रमा कम वर्षा भएको छ ।

प्रदेश-१, वाग्मती, गण्डकी र सुदूरपश्चिम प्रदेशका धेरैजसो ठाउँमा सरदरभन्दा बढी वर्षा भएको छ । तर मधेस प्रदेश र लुम्बिनी प्रदेशका धेरैजसो भू–भागमा सरदर भन्दा कम वर्षा भएको छ । जल तथा मौसम विज्ञान विभागले यस वर्षको मनसुन अवधिमा सरदरभन्दा धेरै वर्षा हुने यसअघि नै प्रक्षेपण गरेको थियो।

विभागको हावापानी शाखाका मौसमविद् सुदर्शन हुमागाईँका अनुसार यो वर्षको मनसुनको औसत सरदर वर्षा १ हजार ४ सय ६२ मिलिमिटर हुने प्रक्षेपण छ । मनसुन अवधिमा १ हजार ५ सय मिलिमिटर हाराहारी वर्षा हुनेगर्छ । अझै दुई महिना वर्षा हुने भएकाले बढी वर्षा हुने आकलन गरिएको उहाँको भनाइ छ ।

नेपालमा यो वर्ष गएको जेठ २२ गतेदेखि मनसुन प्रवेश गरेको थियो । जुनदेखि सेप्टेम्बरसम्म चार महिनाको अवधिलाई दक्षिण एसियाली क्षेत्रमा मनसुनको अवधि मानिन्छ।

एक वर्षमा थपिए ८ लाख बढी करदाता

काठमाडौँ । नेपालमा एक वर्षको अवधिमा ८ लाख करदाता थपिएका छन् । अर्थ मन्त्रालयको तथ्यांक अनुसार स्थायी लेखा नम्बर, मूल्य अभिवृद्धि कर र अन्तःशुल्कमा दर्ता हुने करदाता आर्थिक वर्ष २०७८/७९ को एक वर्षको अवधिमा ८ लाख ४ हजार ४१५ ले थप भएको हो ।

अर्थ मन्त्रालयका अनुसार २०७८ असार मसान्तसम्म नेपालमा ४४ लाख ६१ हजार २७ करदाता रहेका थिए । यो संख्या २०७९ असार मसान्तसम्म आइपुग्दा ५२ लाख ६५ हजार ४४२ रहेको मन्त्रालयको तथ्यांकले देखाएको छ । नेपालमा सबैभन्दा धेरै करदाता स्थायी लेखा नम्बर लिनेहरु छन् ।

सरकारले व्यावसायिक स्थायी लेखा नम्बर र व्यक्तिगत स्थायी लेखा नम्बर बढी वितरण गरेको पाइएको छ । करकट्टी गर्ने निकायले लिनु पर्ने स्थायी लेखा नम्बरमा समेत वृद्धि भएको छ ।

१७ वर्षमुनिको प्रशिक्षणबाट १५ जना खेलाडी बाहिरिए

काठमाडौँ । अखिल नेपाल फुटबल सङ्घ (एन्फा) ले साफ यू–१७ च्याम्पियनशिप र एएफसी यू–१७ एशियन कप छनोटका लागि प्रशिक्षणमा रहेका १५ जना खेलाडी बाहिरिएका जनाएको छ ।

बन्द प्रशिक्षणमा रहेका ४५ खेलाडी मध्येबाट १५ जना बाहिरिएका एन्फाले जनाएको हो । अब प्रशिक्षणमा ३० जना खेलाडी रहेका छन् । मुख्य प्रशिक्षक उर्जन श्रेष्ठले सम्हालेको टोलीबाट शुक्रवार बन्द प्रशिक्षणमा रहेका ४५ खेलाडीबाट १५ खेलाडी बाहिरिएको एन्फाले बताएको छ ।

यससँगै अब यू–१७ को बन्द प्रशिक्षणमा ३० जना खेलाडीमात्र रहेका छन् । श्रीलङ्कामा सेप्टेम्बर ५ मा आयोजना हुने साफ यू–१७ च्याम्पियनशिपमा नेपाल समूह बी मा रहेको छ । नेपाल रहेको समूहमा भारत र भुटान रहेका छन् भने समूह ए मा आयोजक श्रीलङ्का, बङ्गलादेश र माल्दिभ्स छन् ।

यस्तै यू–१७ को अर्को प्रतियोगिता एशियन कप छनोट अक्टोबर १ देखि ९ सम्म हुँदैछ । त्यसका लागि पनि यही टोलीले सहभागिता जनाउने तालिका रहेको छ । छनोट खेल भियतनाममा आयोजना हुँदैछ ।

७ सय ८१ जनामा कोरोना पुष्टि, २ जनाको मृत्यु

काठमाडौँ । पछिल्लो २४ घण्टामा सात सय ८१ जनामा कोरोना भाइरसको सङ्क्रमण पुष्टि भएको छ । पीसीआर र एन्टिजेन गरी चार हजार सात सय १२ जनाको नमुना परीक्षण गर्दा सात सय ८१ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

यही अवधिमा पाँच सय ११ जना कोरोना सङ्क्रमित निको भएका छन् । पछिल्लो २४ घण्टामा कोरोना सङ्क्रमणका कारण दुई जनाको ज्यान गएको छ । अहिले नेपालमा पाँच हजार सात सय ७५ जना कोरोना भाइरसका सक्रिय सङ्क्रमित रहेका छन् ।

यसैबीच पछिल्लो २४ घण्टामा २३ हजार आठ सय एक जनाले कोरोनाविरुद्धको खोप लगाएका स्वास्थ्य मन्त्रालयले जनाएको छ ।

TopNepalNews copyright © 2021 News. All Rights Reserved. Website by Muncha Developers.