22.12¡ÆC
काठमाडौँ । जल तथा मौसम विज्ञान विभागअन्तर्गतको बाढी पूर्वानुमान महाशाखाले अबका केही दिन प्रमुख नदीमा पानीको बहाव उल्लेख्य रूपमा बढ्ने पूर्वानुमान गरेको छ ।
विशेषगरी पर्सि शुक्रबारदेखि आइतबार ११ गतेसम्म कोशी, नारायणी, कर्णाली, महाकाली, कन्काई, कमला, बाग्मती, पूर्वी राप्ती, पश्चिम राप्ती र बबई जलाधार क्षेत्रका नदीमा जलसतह उल्लेख बढ्नेछ ।
आज प्रमुख नदीको बहाव सतर्कता तहभन्दा तल छ । अब हुने ठूलो वर्षाका कारण नदीमा जलसतह बढ्ने र आकस्मिक बाढीको जोखिम रहने हुँदा सतर्कता अपनाउन महाशाखाले आग्रह गरेको छ । आज सबैजसो नदीमा पानीको बहाव सामान्य मात्र बढ्नेछ ।
भोलिदेखि कोशी, कन्काई र कमला नदीमा जलसतह उल्लेख्य रूपमा बढ्नेछ । यसैगरी असोज ९, १० र ११ गते देशभरका प्रायः सबै प्रमुख नदीहरूमा पानीको बहाव उल्लेख्य रूपमा बढ्ने बुलेटिनमा उल्लेख छ । ठुला नदीमा तत्काल ठुलो जोखिम नरहे पनि आज देशका विभिन्न ३१ जिल्ला भई बग्ने स–साना नदीमा भने आकस्मिक बाढीको मध्यम जोखिम रहेको छ ।
कोशी प्रदेशका ताप्लेजुङ, पाँचथर, इलाम, झापा, सुनसरी, मोरङ, तेह्रथुम, सङ्खुवासभा, सोलुखुम्बु, धनकुटा, भोजपुर र खोटाङमा जोखिम रहेको छ। बागमती प्रदेशका दोलखा, रामेछाप, सिन्धुपाल्चोक, काभ्रे, काठमाण्डौ, भक्तपुर, ललितपुर, मकवानपुर, रसुवा, नुवाकोट, धादिङ र चितवनका स–साना नदीमा जलसतह बढ्नेछ ।
त्यस्तै गण्डकी प्रदेशका गोरखा, तनहुँ, कास्की, लमजुङ र नवलपरासी पूर्व तथा कोशी प्रदेशको उदयपुर आसपासका जिल्ला भई बहने स–साना नदीहरूको बहाव उल्लेख्य बढ्नेछ ।
