टप नेपाल न्यूज 
काठमाडौँ । स्वास्थ्य सेवा विभागको नियमित खरिद प्रक्रियाअन्तर्गत सर्पदंश र रेबिजविरुद्धको खोप आएको छ ।
स्वास्थ्य सेवा विभागका निमित्त महानिर्देशक डा. अनुज भट्टचनले सर्पदंश र रेबिजविरुद्ध प्रयोग हुने खोप प्राप्त भएको जानकारी दिनुभयो । उहाँका अनुसार सर्पदंशविरुद्धको आठ हजार २०० भायल र रेबिजविरुद्धको १७ हजार ६०० भायल खोप काठमाण्डौ टेकुमा रहेको केन्द्रीय खोप भण्डारण केन्द्रमा राखिएको छ ।
प्राप्त खोप आवश्यक प्रक्रिया पूरा गरी सात वटै प्रदेशका स्वास्थ्य आपूर्ति केन्द्रमार्फत सम्बन्धित स्वास्थ्य संस्थामा वितरण गरिनेछ । केही दिनअघिदेखि विशेष गरी रेबिजविरुद्धको खोप सहज रूपमा प्राप्त नभएको गुनासो थियो । गर्मी थप बढ्न थालेसँगै मधेश प्रदेशलगायत विभिन्न ठाउँमा सर्पदंशका घटना बढ्न थालेका छन् ।
अत्यधिक गर्मीका कारण रौतहट, बारा र पर्सालगायत जिल्लामा सर्पदंशका घटना बढेका छन् । वीरगञ्जमा रहेको नारायणी अस्पतालका प्रवक्ता डा. उदयनारायण सिंहका अनुसार अस्पतालमा दैनिक १० देखि १५ जनासम्म सर्पदंशका बिरामी उपचार गर्न आउने गरेका छन् । केही दिनअघिसम्म एन्टीस्नेक भेनमको अभाव देखिए पनि अहिले अस्पतालमा १०० भायल औषधि मौज्दात रहेको अस्पतालले जनाएको छ ।
डा. सिंहले सर्पदंशबाट जोगिन राति सुत्दा झुल प्रयोग गर्न, घर वरपरको झाडी सफा राख्न, खेतमा काम गर्दा बुट तथा सुरक्षात्मक सामग्री प्रयोग गर्न तथा सर्पले टोकेपछि झारफुकमा नलागी तत्काल नजिकको स्वास्थ्य संस्थामा पुग्न आग्रह पनि गर्नुभएको छ । मधेश प्रदेश सरकारले सर्पदंशलाई मनसुन र गर्मी याममा बढी देखिने सार्वजनिक स्वास्थ्य समस्याका रूपमा लिँदै उपचार केन्द्रमा औषधि, स्वास्थ्यकर्मी र आवश्यक उपकरणको व्यवस्थापनलाई व्यवस्थित बनाएको दाबी गरेको छ ।
मधेश प्रदेश स्वास्थ्य आपूर्ति केन्द्रका प्रमुख डा. नागेन्द्र यादवका अनुसार सर्पदंशको उपचार हुने प्रदेशका २७ वटै अस्पताल तथा उपचार केन्द्रमा आवश्यकताअनुसार एन्टीस्नेक भेनम पठाउन थालिएको छ । प्रदेश स्वास्थ्य आपूर्ति केन्द्रमा अहिले ९०० भायल एन्टीस्नेक भेनम मौज्दात रहेको छ भने थप औषधि आउने प्रक्रियामा रहेको डा. यादवले बताउनुभयो ।
ताजा समाचारहरू