श्रम तथ्याङ्क संकलन गर्न देशभर चौथो नेपाल श्रमशक्ति सर्वेक्षण सञ्चालनमा

काठमाडौँ । श्रम बजार सम्बन्धी तथ्याङ्क अद्यावधिक गर्ने उद्देश्यले राष्ट्रिय तथ्याङ्क कार्यालयले देशव्यापी रूपमा चौथो नेपाल श्रमशक्ति सर्वेक्षण सञ्चालन गरेको छ ।

कार्यालयका अनुसार देशको कुल श्रमशक्ति, रोजगारी तथा बेरोजगारीको अवस्था, श्रमको प्रकृति र श्रम बजारको वास्तविक स्थिति पहिचान गर्न सर्वेक्षण शुरु गरिएको हो ।

मौसमी रोजगारीमा हुने उतारचढाव र त्यसको प्रभावसमेत अध्ययन गर्न गएको फागुनदेखि तथ्याङ्क सङ्कलन शुरु गरिएको छ भने आउँदो फागुनसम्म चल्नेछ ।

राष्ट्रिय तथ्याङ्क कार्यालयका प्रवक्ता ढुण्डिराज लामिछानेका अनुसार सर्वेक्षणमा श्रम गर्ने उमेर समूहका जनसङ्ख्यालाई समेटिनेछ । यस क्रममा शिक्षा र सीपको स्तर, श्रमको प्रकृति, बालश्रम, बाध्यकारी श्रम तथा जोखिमयुक्त कामको अवस्थाबारे पनि विस्तृत तथ्याङ्क सङ्कलन गरिनेछ ।

सर्वेक्षणअन्तर्गत सातवटै प्रदेशका झण्डै १८ हजार घरपरिवारमा गणक परिचालन गरी आवश्यक विवरण सङ्कलन गरिने कार्यक्रम रहेको कार्यालयले जनाएको छ ।

नेपालमा श्रमशक्ति सर्वेक्षण पहिलोपटक २०५५/५६, दोस्रोपटक २०६४/६५ र तेस्रोपटक २०७४/७५ सालमा सञ्चालन गरिएको थियो ।

चौथो सर्वेक्षणबाट प्राप्त हुने तथ्याङ्कले श्रम, रोजगारी तथा मानव स्रोत विकाससम्बन्धी नीति निर्माण र योजना तर्जुमामा महत्वपूर्ण आधार प्रदान गर्ने अपेक्षा गरिएको छ ।