तारकेश्वर अध्यक्ष अधिकारीको नविन योजना : ‘बुक फ्री डे’लाई सीप र संस्कारमूलक शिक्षासँग जोडिने

नुवाकोट । तारकेश्वर गाउँपालिका अध्यक्ष तथा गाउँ शिक्षा समिति संयोजक शिव अधिकारी ‘अविरल’को अध्यक्षतामा बिहीबार बसेको गाउँ शिक्षा समितिको बैठकले विद्यालय शिक्षामा गुणस्तर सुधार, सीप विकास र संस्कारमूलक शिक्षालाई प्रभावकारी बनाउने उद्देश्यसहित महत्वपूर्ण निर्णयहरू गरेको छ।

अध्यक्ष अधिकारीको परिकल्पना अनुसार बैठकले विद्यालयहरूमा प्रत्येक शुक्रबार सञ्चालन हुँदै आएको ‘बुक फ्री डे’ कार्यक्रमलाई थप व्यवस्थित र प्रभावकारी बनाउने निर्णय गरेको छ।

शुक्रबारका दिन बिहान १०:०० बजेदेखि २:०० बजेसम्म ‘हेर्दै, गर्दै, पढ्दै, सिक्दै’ कार्यक्रमअन्तर्गत विद्यार्थीलाई दैनिक जीवनमा उपयोगी हुने विभिन्न सीपमूलक कक्षा सञ्चालन गर्ने निर्णय गरेको हो ।

त्यसैगरी २:०० बजेदेखि ४:०० बजेसम्म संस्कृति, सभ्यता, नैतिक शिक्षा, आत्मविश्वास र आत्म-अनुशासन विकासमा केन्द्रित संस्कारमूलक कक्षा सञ्चालन गरिनेछ।

बैठकले गाउँपालिका अध्यक्ष अधिकारीले गत २०८३ साल वैशाख ३१ गते शैक्षिक सुधार तथा नतिजा सुधारका लागि गाउँपालिकाभित्रका ३४ वटा विद्यालयलाई जारी गर्नुभएको ७ बुँदे निर्देशन पूर्णरूपमा कार्यान्वयन गराउने निर्णयसमेत गरेको छ।

तारकेश्वर अध्यक्ष शिव अधिकारी ‘अबिरल’ले दिनुभएको निर्देशनअनुसार:

* प्रत्येक विद्यालयले हरेक महिनाको अन्तिम सातामा शैक्षिक गतिविधि, शिक्षक–कर्मचारी तथा विद्यार्थीको सहभागिता र उपलब्धिसहितको मासिक प्रतिवेदन शिक्षा शाखामा अनिवार्य रूपमा पेश गर्नुपर्नेछ।
* प्रधानाध्यापक तथा शिक्षक–शिक्षिकाले अत्यावश्यक अवस्थाबाहेक बिदा लिन नपाउने तथा बिदा आवश्यक परे शिक्षा शाखाको अनुमति लिनुपर्नेछ।
* विषयगत शिक्षकहरूले सबै विद्यार्थीलाई उत्तीर्ण गराउने लक्ष्यका साथ आवश्यक परे अतिरिक्त समय दिएर समेत अध्यापन गर्नुपर्नेछ।
* विद्यालयको शैक्षिक सुधारका लागि प्रधानाध्यापकले कानुन र विधिअनुसार कडा कदम चाल्नुपर्नेछ। सुधारमा प्रभावकारी भूमिका निर्वाह गर्न नसके प्रधानाध्यापकलाई बर्खास्तसम्म गरिने उल्लेख छ।
* विद्यालय समयभित्र शिक्षक–शिक्षिकाले मेला, पर्व, भोजभतेर लगायतका व्यक्तिगत कार्यक्रममा सहभागी हुन नपाउने व्यवस्था गरिएको छ।
* विद्यालय व्यवस्थापन समितिले नियमित अनुगमन गरी देखिएका कमजोरी तत्काल शिक्षा शाखामा जानकारी गराउनुपर्नेछ।
* प्रत्येक विद्यालयले मासिक रूपमा SEE लक्षित स्तरोन्नति परीक्षा (मिनी एक्जाम/बुस्टअप टेस्ट) सञ्चालन गरी नतिजाका आधारमा आगामी महिनाको कार्ययोजना तयार गर्नुपर्नेछ।