आत्मघाती विस्फोटमा ८ को ज्यान गयो, १५ वर्षीय किशोर संलग्‍न रहेको पाइयो

<p>एजेन्सी । पाकिस्तानको दोस्रो ठूलो सहर लाहोरको सूफी दरगाह दाता दरबारमा दर्शनार्थीहरु खचाखच थिए । दक्षिण एसियाकै सबभन्दा पुरानो दरगाहमध्ये एक मानिने लाहोरको सूफी दरगाह दातामा अरुदिन त भिडभाड हुन्थ्यो भने अहिले त मुस्लिम धर्मालम्बीको मुख्य चाड रमजान चलिरहेकोले त्यहाँ भिडभाड बढी नै थियो । <br><br>त्यसको सुरक्षार्थ दरगाह दाता दरबार बाहिर सुरक्षाकर्मी तैनाथ थिए । एकाएक बुधबार बिहान दरगाह दाता दरबारको दुई नम्बर गेटको महिला प्रवेशद्वार बाहिर सुरक्षामा खटिएको प्रहरी टोलीको भ्यान लक्षित बम विस्फोट भएको पाकिस्तानी सञ्‍चार माध्यम <b>डन डटकमा उल्‍लेख छ । </b><br><br>उक्त विस्फोटमा पाँच सुरक्षाकर्मी र तीन स्थानीयसहित आठ जनाको मृत्यु भयो भने २५ भन्दा बढी घाइते भए । किङ इडवार्ड चिकित्सा विश्वविद्यालयका उपकुलपति प्रोफेसर खालिद गोन्डलले मृत्यु हुनेको संख्या अझै बढ्‍न सक्ने बताएका छन् । उनले घाइतेमध्ये चार जनाको अवस्था गम्भीर रहेको बताएका छन् । घाइतेमध्ये सात जनालाई मायो अस्पतालमा भर्ना गरिएको छ । <br><br>प्रहरीका अनुसार उक्त विस्फोट आत्मघाती बम हमला गराइएको थियो । पन्जाबका मुख्यमन्त्रीका प्रवक्ता शहबाज गिलले सञ्‍चारमाध्यसँग कुरा गर्दै भने, " उक्त आत्मघाती हमला एक १५ वर्षीय किशोरले गरेका थिए । ती किशोर एक फलफूल पसलबाट निस्किए र प्रहरीको भ्यान नजिकै आएर र विस्फोट गराए ।" <br><br>उक्त बममा सात किलो विस्फोटक पदार्थ भरिएको अनुसन्धानबाट खुलेको जनाइएको छ । टेलिभिजनमा देखाइएका उक्त विस्फोटका दृश्यहरु निकै कारुणिक छन् । नजिकै पार्कीङमा राखेका सवारी साधनहरुका झ्यालका सिसा फुटेका छन् भने नजिकैका भवनहरु चर्किएका छन् ।&nbsp; विस्फोट लगत्तै त्यहाँ निकै भागदौड मच्चिएको थियो । सुरक्षाकर्मीले तत्काल उक्त क्षेत्रलाई घेरा हालेर अनुसन्धान थालेका थिए । &nbsp; <br></p>