काँग्रेस कोषाध्यक्षको सम्मेलन शुरु

<p><b>नुवाकोट । </b>नेपाली कांग्रेस जिल्ला कार्यसमितिका कोषाध्यक्षहरूको दोस्रो राष्ट्रिय सम्मेलन आजदेखि यहाँ शुरु भयो ।<br>कांग्रेस जिल्लाका कोषहरूलाई पारदर्शी, सुदृढ र जवाफदेही बनाउन आयोजना गरिएको सम्मेलनको उद्घाटन समारोहमा सम्बोधन गर्ने शीर्ष नेताहरूले पार्टी कमजोर हुनुका कारण खोजेर सुधार गर्नेतर्फ ध्यान दिनुपर्नेमा जोड दिनुभयो ।<br>सम्मेलनमा पार्टी सभापति शेरबहादुर देउवाले पार्टीमा कायम रहेका तिक्तता तथा एक–आपसको बैमनश्यता बिर्सिएर अघि बढ्नुको विकल्प नभएकाले त्यसमा छलफल चलाउन कोषाध्यक्षहरूलाई आग्रह गर्नुभयो ।<br>“कोषाध्यक्षलाई महासमिति बैठकमा आमन्त्रित सदस्यको रुपमा सहभागी गराएर यहाँ छलफल हुने विषयमा धारणा राख्न दिइनेछ ।” सभापति देउवाले भन्नुभयो “ शुक्रबारदेखि शुरु हुन लागेको केन्द्रीय समितिको बैठकमा निर्वाचनमा भोगेकोे पराजयको विषयमा हुने छलफल यही कोषाध्यक्षहरूको भेलाबाट अघि बढाउनु जायज हुन्छ ।”<br><br>वरिष्ठ नेता रामचन्द्र पौडेलले जनताले काँग्रेसको सिद्धान्तलाई स्वीकार गरेपनि पार्टीभित्रकै कमजोरीको कारण पछिल्ला तीनवटै चुनावमा ठूलो क्षति भोग्नुपरेको बताउनुभयो ।<br><br>“पार्टीको सिद्धान्त राम्रा थिए तर, नेता र कार्यकर्ताले जनतालाई त्यसको विशेषता बुझाउन सकेनन्,” पौडेलले भन्नुभयो “हारपछि पार्टी सुस्त भए पनि थप चलाएमान भएमा अर्को पटक नतिजा उल्टाउन सकिनेछ, त्यही विश्वास लिनुपर्छ ।”<br><br>महामन्त्री डा शशांक कोइरालाले आफ्नो पार्टीको नेतृत्वमा भएका विकासको प्रचार गर्न नसक्नु अनि आन्तरिक प्रतिस्पर्धामा गुट र उपगुटमा फस्नु पराजयका कारण भएकाले त्यसमा सम्मेलनले सही विश्लेषण गर्दै घोषणापत्रमा उल्लेख गर्नुपर्ने सुझाव दिनुभयो ।<br><br>सम्मेलनमा पार्टी कोषाध्यक्ष सितादेवी यादव, पूर्वमहामन्त्री प्रकाशमान सिंह, केन्द्रीय सदस्यहरू अर्जुननरसिह केसी, डा.प्रकाशरण महतलगायतले पछिल्लो निर्वाचनअन्तर्गत स्थानीयतहमा माओवादी केन्द्रसँगको निर्वाचन एकता घातक बनेको र प्रदेश र संघीय निर्वाचनमा पार्टीको एजेण्डा प्रभावकारी भएपनि वाम–गठबन्धनको सस्तो प्रचारबाजी चिर्न नसक्नु नै हारको मुख्य कारण भएको विचार व्यक्त गर्नुभयो ।<br><br>उहाँहरूले अब पार्टीभित्रका स–साना विवाद तथा गुटगत प्रवृत्ति अन्त्य गरी एकढिक्का भएर अघि बढ्न शीर्ष नेतादेखि कार्यकर्तासम्ममा प्रतिबद्धता आवश्यक रहेकोमा जोड दिनुभयो ।</p><p><br><br>“लोकनायक गिरिजाप्रसाद कोइरालाको आठौँ पुण्यतिथि’को अवसर पारेर आयोजना गरिएको मुलुकभरका कोषाध्यक्षहरूको दोस्रो सम्मेलनले वर्तमान सन्दर्भमा कांग्रेसको कमजोर अवस्था र कार्यकर्तामा छाएको निरासाको समीक्षा, बन्दसत्र र प्रशिक्षणमा जिल्लाको रिपोटिङ, भावी रणनीति तय एवम् संयुक्त घोषणापत्र जारी गर्ने कोषाध्यक्षका संयोजक गोविन्द पुडासैनीले जानकारी दिनुभयो ।<br><br>बुधबार रातिदेखि शुरु भएको बन्दसत्र प्रशिक्षणसहितको हुने र त्यो बिहीबारसम्म चल्ने तनहुँ कोषाध्यक्ष रेशम गुरुङले बताउनुभयो । सम्मेलन रसुवाको स्याफ्रुवेसीमा शुक्रबार भेलाको समीक्षा बैठकसहित समापन हुनेछ । <br><br></p>