तारे होटलमा बसेर होमेस्टेको खर्च, मन्त्रालय सुनसान बनाएर मन्त्रीदेखि कर्मचारी सेिमनारमा

<p>प्राय: चहलपहल देखिने पर्यटन मन्त्रालय बिहीबार साढे १ बजे नै सुनसान भयो। पर्यटनमन्त्रीदेखि सचिव, सहसचिव र उपसचिवका कार्यकक्षमध्ये कतिपयका ढोकामा ताला थियो भने केहीमा चुकुल मात्र लागेको थियो। कतिपय कोठाका ढोका खुलै भए पनि कार्यकक्षमा कर्मचारी थिएनन्। नयाँ पत्रिका दैनिकमा समाचार छ।<br>&nbsp;<br>केही अधिकृत र तल्लो तहका कर्मचारी भने कार्यालयमा थिए। करिब सवा दुई बजे प्राविधिकतर्फका एक उपसचिव र एक शाखा अधिकृत मन्त्रालयको गेटमा भेटिए। भेटिनासाथ उनीहरूमध्ये एकले ठट्यौली पारामा भने, ‘मन्त्रालयमा कोही छैन भन्ठान्नुभएको होला, अड्डा सम्हाल्न हामी बसेका छौँ।’ <br>&nbsp;<br>उनीहरू खाजा खाएर फर्किएका थिए। पर्यटन मन्त्रालय र सार्क सचिवालयको संयुक्त आयोजनामा दुई दिनसम्म चल्ने सार्कस्तरीय ग्रामीण पर्यटन कार्यशालामा भाग लिन उच्चपदस्थ कर्मचारी ललितपुरको गोदावरीस्थित एक तारे होटेलतिर लागेपछि मन्त्रालय रित्तिएको हो। मन्त्रालयका मात्र होइन, नेपाल पर्यटन बोर्ड, पर्यटन विभाग, नेपाल नागरिक उड्डयन प्राधिकरणलगायत निकायका उच्चपदस्थ अधिकारीसमेत आवासीय कार्यशालाका लागि गोदावरी पुगेका छन्। <br>&nbsp;<br>होमस्टेमा गर्ने कार्यक्रम होटेलमा सारियो<br>&nbsp;<br>मन्त्रालय स्रोतका अनुसार ग्रामीण पर्यटनसँग सम्बन्धित भएकाले कार्यक्रम उपत्यकाबाहिरका होमस्टेमा गर्ने तयारी थियो । त्यसका लागि दुई सदस्यीय समिति बनाएर अध्ययन थालिएको थियो। समितिले लमजुङको घलेगाउँ, नवलपरासीको अमलटारी र बर्दियाको डल्ला होमस्टेमध्ये एक स्थानमा कार्यशाला गर्न उपयुक्त हुने प्रतिवेदन बुझाएको थियो। पछि मन्त्रालयले वर्षालाई कारण बनाएर तारे होटेलमा कार्यशाला गर्ने निर्णय गरेको हो।<br>&nbsp;<br><b>दुईदिने कार्यक्रम, ३७ लाख बजेट</b><br>&nbsp;<br>सरकारी कर्मचारीसहितका पाहुनाका लागि बिहीबार होटेलमै बास बस्ने व्यवस्था मिलाइएको छ। शुक्रबार मात्र नगरकोटस्थित बास्तोला होमस्टे भ्रमण गराउने कार्यक्रम तय गरिएको छ। मन्त्रालय स्रोतका अनुसार कार्याशालाका लागि करिब ३७ लाख रुपैयाँ बजेट छुट्याइएको छ। त्यसमध्ये पर्यटन मन्त्रालयले १० लाख रुपैयाँ व्यहोर्नेछ। बाँकी बजेट भने सार्क सचिवालयको हो। <br><br></p>