मन्त्री भएकै समयमा संयोगले स्वाइनफ्लु लाग्यो स्वास्थ्यमन्त्री पोखरेल

<p>काठमाण्डौ । स्वास्थ्यमन्त्री गिरिराजमणि पोखरेल एक साता लामो उपचारपछि आइतबार अस्पतालबाट डिस्चार्ज भएका छन् । ज्वरो आउने, रुघाखोकी, बान्ता हुनेजस्ता समस्या देखिएपछि स्वास्थ्यमन्त्री ११ भदौमा वीर अस्पतालमा भर्ना भएका थिए ।<br></p><p><br></p><p>अस्पतालबाट डिस्चार्ज भएपछि मन्त्री पोखरेलले पत्रकारहरूसँग कुरा गर्दै संयोगवश आफूलाई स्वाइनफ्लु ९मौसमी रुघाखोकी० देखा परेको बताए । उनले आफूमा स्वाइनफ्लु एच१एन१ पोजेटिभ देखिएको जानकारी दिए ।</p><p><br></p><p>बाढी प्रभावित क्षेत्र महोत्तरीमा राहत वितरणमा जाँदा एक्कासि मन्त्री पोखरेल बिरामी परेका थिए ।</p><p><br></p><p>‘एच१एन१ सिजनल इन्फ्लुएन्जा हो । मलाई पनि संयोगवश देखियो, तर, आत्तिनुपर्ने अवस्था छैन,’ उनले भने । स्वदेशमै विशिष्ट सेवा रहेको भन्दै मन्त्री पोखरेलले उपचारका नाममा विदेश जाने प्रथाको अन्त्य गर्नुपर्ने बताए । ‘वीर अस्पतालले राम्रो र गुणस्तरीय सेवा दिन सक्छ भन्ने विश्वास लिएर उपचार गराउन आएको हुँ । त्यही विश्वासलाई जीवित लिएर फर्किएँ,’ पोखरेलले भने ।</p><p><br></p><p>सरकारी सेवा भरपर्दो&nbsp;</p><p>सरकारी स्वास्थ्य संस्थाले प्रदान गरेको सेवामा शंका गर्नेहरू पनि रहेको भन्दै मन्त्री पोखरेलले भने, ‘शंकाको भरमा स्वदेशमा उपचार नगराएर विदेश जानेहरूले एकपटक वीर अस्पतालमा स्वास्थ्य सेवा लिएर हेरुन् ।’</p><p><br></p><p>आफ्नो एक साता लामो बसाइका क्रममा अस्पतालको सेवामा धेरै प्रकारको प्रतिभा फेला पारेको उनले बताए । नेतृत्व तहमा बसेका हामी आफैँ सरकारी सेवामा सामेल भएमा विश्वास जित्न सक्ने उनको भनाइ छ ।</p><p><br></p><p>आफूले वीर अस्पताल बसाइमा अस्पतालमा गर्नुपर्ने सुधारात्मक कामहरू नजिकबाट जान्ने र बुझ्ने मौका पाएको भन्दै उनले यसलाई विशेष वार्ड थप गरेर सेवा दिने व्यवस्था मिलाउने बताए ।</p><p><br></p><p>‘चिकित्सक, नर्स, पारामेडिक्सहरूको समस्या नजिकबाट नियाल्ने मौका पाएँ, यसलाई व्यवस्थित र सुदृढ गर्दै अगाडि लैजानेमा मेरो भूमिका रहनेछ,’ मन्त्री पोखरेलले भने ।</p><p><br></p><p>मधुमेह र प्रोस्टेटको पनि समस्या</p><p>स्वास्थ्यमन्त्री पोखरेललाई मधुमेह र प्रोस्टेटको पनि समस्या रहेको चिकित्सकले बताएका छन् । वीर अस्पतालका निर्देशक प्रा।डा भूपेन्द्रकुमार बस्नेतले मन्त्री पोखरेललाई इन्फ्लुएन्जा एच१एन१ पोजेटिभ देखिएकाले पाँच दिनका लागि औषधि चलाएको बताए ।</p>