टेलिकमले पनि मोबाईलको ब्यालेन्स सकिए ‘सापटी’ दिने

Posted on: March 28, 2017 | views: 593

काठमाडौं, चैत १५ । नेपाल टेलिकमले पनि अबदेखि आफ्ना ग्राहकहरुलाई ब्यालेन्स सकिँदा सापटी दिने व्यवस्था सुरु गर्ने भएको छ । यसका लागि नेपाल टेलिकम र हङकङस्थित टियाक्सको लोकल एजेन्ट हेमन्त ट्रेड सेन्टर प्रालिसँग सम्झौता भएकाे छ। चैत ६ गते भएको उक्त सम्झौता पत्रमा नेपाल टेलिकमको तर्फबाट कम्पनीका प्रबन्ध निर्देशक कामिनी राजभण्डारी र हेमन्त ट्रेड सेन्टर प्रालिका तर्फबाट निर्देशक हेमन्त अग्रवालले हस्ताक्षर गरेका छन्।

यसअघि एनसेलले सुरु गरिसकेको यो योजनालाई टेलिकमले पनि पछ्याउँदै ग्राहकलाई सापटी दिन लागेको हो । यो सुविधा सीडीएमए तथा जिएसएम प्रिपेड ग्राहकले मात्र पाउनेछन् । कुरा गर्दागर्दै ब्यालेन्स सकिए पनि कुराकानी निरन्तर भइरहोस् भन्ने उद्देश्यले कम्पनीले एयर टाइम क्रेडिटको सुविधा ल्याइएको टेलिकमको दाबी छ । टेलिकमले यसका लागि आवश्यक तयारी अन्तिम चरणमा पुर्याएपनि कति रकम सापटी दिने भन्नेबारे चाहिँ निर्णय भैसकेको छैन ।

यो योजना सुरु भएपछि ग्राहकले आफ्नो ब्यालेन्स सकिएपछि रकम सापटी लिन सक्नेछन् र सापटी रकम अर्को पटक रिर्चाज गर्दा स्वतः काटिनेछ । कम्पनीका ग्राहकलाई थप सुविधा प्रदान गर्दै जाने नीति अनुरुप सीडीएमए तथा जिएसएम प्रिपेड मोबाइलबाट  सो सुविधा प्रयोग गरे वापत थप कुनै अनिरिक्त शुल्क वा ब्याज नलिई उपभोक्तालाई लोन रकम उपलब्ध हुने छ, र रिचार्ज पछि उपलब्ध हुने ब्यालेन्सबाट कट्टा हुनेछ ।  यसबाट मोबाइलमा ब्यालेन्स सकिएको अवस्थामा पनि आफन्तजन सँग कुराकानी गर्न सहज हुनेछ। तर, यो योजना अबको पाँच महिना भित्रमा सञ्चालन आउने कम्पनीले जनाएको छ।  यो सुविधा सम्झौता भएको मितिले ५ महिना भित्रमा सञ्चालन गर्ने लक्ष्य रहेको छ ।