टेलिकमको प्रिपेडमा पनि फोर जी, सिआरबिटी सुचारु सँगै सुबिधा र छुटको अफर

Posted on: February 03, 2017 | views: 711

काठमाडौं ।
नेपाल टेलिकमले भोलिबाट प्रिपेड सिम प्रयोगकर्ताहरुलाइ पनि फोर जी सेवा दिने भएको छ ।

तत्कालका लागि काठमाडौं र पोखरामा दिन लागिएको जीएसएम प्रिपेडमा फोर जी चलेपनि यो सेवा विस्तार गर्दै लगिने टेलिकमले बताएको छ ।

फोर जी सेवा गत पुस १७ गतदेखि टेलिकमले काठमाडौं र पोखराका पोष्टपेड ग्राहकलाई दिंदै आएको छ । पोष्टपेडमा फोर जी सेवा दिन थालेपछि पोष्टपेड सेवा लिने ग्राहकहरुको संख्या बडिरहँदा टेलिकमले प्रिपेड प्रयोगकर्तालाई पनि यो सुविधा दिन लागेको हो ।

टेलिकमले ३९ करोड रुपैयाँको प्रविधि लगानि गरेर काठमाडौंमा ३ सय ८ वटा बिटीएस टावरलाई अपग्रेड एवं पोखरामा ७९ वटा टावरको स्तरोन्नति सहित फोर जी सेवा थालेको हो ।

पोखरामा हाल लेकसाइड र न्युरोड क्षेत्रमा फोर जी सेवा उपलब्ध रहेको छ । टेलिकमका अनुसार फोर जीले अधिकतम् ३२.४ एमबीपीएस गतिको डाटा चल्छ भने यसलाई १०० एमबीपीएस बनाउन टेलिकमले ५ मेगाहर्ज ब्याण्डविथ थप गर्ने तयारी गरिरहेको छ ।

टेलिकमले तत्कालका लागि भने आइफोन सिक्स र सेभेन सिरिजमा भने यो सेवा सपोर्ट नगर्ने स्पष्ट पारेको छ ।

यसैबीच टेलिकमले कल रिङ ब्याक टोन 'सिआरबिटी' सेवा पनि भोलिबाटै पुन सुचारु गर्ने भएको छ ।

टेलिकमले वार्षिक उत्सवको अवसर पारेर नयाँ छुट र अफरको घोषणा भोलि गर्ने बताएको छ ।