धादिङमा पहिरोले ७ घर पुर्यो

Posted on: July 19, 2017 | views: 7353

धादिङ ।

धादिङको गंगाजमुना गाउँपालिका–२ स्थित कुन्दुङ गाउँमा आज बिहान पहिरोले ७ घर पुरेको छ । गंगाजमुना–१ को ख्यामीडाँडा भन्ने ठाउँबाट पहिरो झरेर गाउँ पुरिएको हो ।


१२ घर रहेको त्यस गाउँमा पानी परेसँगै ढुंगाहरू खस्न थालेपछि मानिसहरू भने हिजो साँझ नै अन्यन्त्र स्थानान्तरण भएका थिए । 


मानिस सबै अन्यन्त्र पुगेकाले मानवीय क्षति नभएपनि सात वटा घर पुरिएको र पहिरो अझै पनि आइरहेकाले बाँकी घरहरु पनि पुरिन सक्ने गंगाजमुना गाउँपालिका–१ का वडा अध्यक्ष फैसिङ तामाङले बताउनुभयो । 


भूकम्प पश्चात नै पहिरोको जोखिमयुक्त क्षेत्र घोषणा गरिएको उक्त गाउँ सदमुकाम धादिङवेसीबाट दुई दिनको पैदल यात्रामा पर्दछ । 


जिल्ला दैवी प्रकोप उद्वार समितिको बैठक बसेर पहिरो पीडितलाई तत्काल अन्यत्र सार्ने र राहत पुर्याउने निर्णय गरेको छ ।