यसरी बन्दै छ , राजपा लचक

Posted on: July 16, 2017 | views: 204
काठमाडौं । संविधानप्रति असन्तुष्ट रहँदै आएको राष्ट्रिय जनता पार्टी (राजपा) नेपाल पछिल्ला दिनमा स्थानीय तह निर्वाचनमा सहभागी हुन लचक देखिन थालेको छ ।

तर, उसले सत्तारुढ दलले राजनीतिक इमान्दारिता देखाउनुपर्ने अडान राखेको छ ।

राष्ट्रिय जनता पार्टीलाई स्थानीय तह निर्वाचनमा सहभागी गराउन सत्तारुढ दलहरुले लगातार प्रयास गर्दै आएका छन् । सोहीक्रममा सरकारपक्षीय दल र राजपाका शीर्ष नेताहरुबीच पटक–पटक संवादसमेत भएको छ ।

संविधान संशोधनको विषय पेचिलो बन्दै गएपछि राजपाले राजनीतिक इमान्दारिताको संकट गहिरिएको विश्लेषण गरेको छ ।

केही दिनयता तेस्रो चरणको निर्वाचनमा सहभागी हुन राजपाका शीर्ष नेतृत्वले सहमतिका लागि लचक हुनसक्ने संकेत गरेको छ । निर्वाचन आयोगमा राजपाको दल दर्ताले पनि यसमा प्रस्ट संकेत गरेको देखिन्छ ।

संविधान संशोधनलाई विगतमा ‘बटमलाइन’ बनाएको राजपाले सरकारले पूर्वसहमति कार्यान्वयन गर्न इमान्दारिता देखाउनुपर्ने बताउन थालेको छ ।

राजनीतिक इमान्दारिता देखाएर पूर्वसहमति कार्यान्वयन गरेर देखाए निर्वाचनमा सहभागी हुने ढोका खुल्ने राजपाले बताए ।