एकदिनमा ४२ हजार राजश्व संकलन : ३३ सय यात्रु कारबाहीमा

Posted on: May 31, 2017 | views: 262

काठमाडौं ।  मंगलबारदेखि उपत्यकामा पैदल यात्रु सुरक्षा अभियान लागू गरेको छ । महानगरीय ट्राफिक प्रहरी महाशाखाले करिब डेढ महिना जनचेतनाका कार्यक्रम सञ्चालन गरेर नियम लागू गरिएको पहिलो दिनमै साढे ३३ हजार पैदल यात्रु कारबाहीमा परेका छन् । 

दुर्घटना न्यूनीकरण गर्न महानगरीय ट्राफिक प्रहरी महाशाखाले मंगलबारदेखि पैदल यात्रु सुरक्षा अभियानको नियम लागू गरेको डिआइजी मिङमार लामाले बताए ।  काठमाडौं, ललितपुर र भक्तपुरमा जथाभावी सडक पार गर्ने ३३ सय ४८ पैदल यात्रु कारबाहीमा परेका छन् ।


एकदिनमा ४२ हजार राजश्व संकलन

पैदल यात्रु सुरक्षा अभियान नियम लागू भएको पहिलो दिनमै कारबाहीबाट ४२ हजार चार सय बढी राजश्व संकलन भएको ट्राफिक प्रहरी महाशाखाका डिआइजी मिङमार लामाले जानकारी दिए । महाशाखाका अनुसार जेब्रा क्रसिङबाहेक जथाभावी सडक पार गर्ने २ हजार एक सय २० पैदल यात्रुबाट जनही २ सयका दरले राजश्व असुल गरिएको छ । जरिवाना तिर्न नसकेका एक हजार २ सय २८ पैदल यात्रुलाई सडक सुरक्षा कक्षा लिएपछि छाडिएको डिआइजी लामाले बताए ।


उपत्यकामा सबै भन्दा बढी काठमाडौंमा पैदल यात्रु कारबाहीमा परेका छन् । काठमाडौंको दरबारमार्गमा दुई सय ४० र नयाँ बसपार्क क्षेत्रमा २ सय २१ जना कारबाहीमा परेका छन् ।


पैदल यात्रुमा धेरै लापरवाही

जनचेतनापछि पनि पैदल यात्रु सचेत नभएको डिआइजी मिङमार लामाले बताए । ‘करीब डेढ महिना जनचेतना अभियान चलाउदा पनि पैदल यात्रुमा धेरै लापरवाही देखिएको छ’, डिआइजी लामाले भने, ‘त्यतिधेरै सचेत पार्दा पनि एकै दिनमा धेरै संख्यामा कारबाहीमा पर्नुले पैदलयात्रुको लापरवाही पुष्टि गर्छ ।’