कक्षा ९ मा फेल भएकी किशोरीले आत्महत्या गरिन

Posted on: April 18, 2017 | views: 2091

नुवाकोट, बैशाख । कक्षा ९ मा फेल भएपछि नुवाकोट चौघडाकी १५ वर्षीयाँ किशोरीले विष सेवन गरी आत्महत्या गरेकी छिन् । क्षेत्रपाल माध्यामिक विद्यालयमा अध्ययनरत लिखु गाँउपालिका–४ साविकको चौघडा–७ की सञ्जु पण्डितले परीक्षामा अनुर्तिण भएपछि विष सेवन गरी आत्महत्या गरेकी छन् । चैत ३० गते सार्वजनिक भएको परीक्षामा फेल पछि ३१ गते विष सेवन गरी सिकिस्त भएकी सञ्जुको उपचारको क्रममा पाटन अस्पताल ललितपुरमा मृत्यु भएको उनको आमा नारायणी पण्डितले बताइन् ।

अध्ययनमा जेहेन्दार भएपनि कक्षा ९ को अन्तिम परीक्षामा असफल भएपछि उत्तरपुस्तिक हेर्न माग गर्दा नपाएपछि उनले आत्महत्या गर्न पुगेको जिल्ला प्रहरी कार्यालय नुवाकोटको अनुसन्धानले देखाएको छ । परीक्षाको सबै विषयमा असफल भएकी पण्डितले विद्यालयका प्रध्यानध्यापक कृष्णबहादुर राईसंग उत्तरपुस्तिका हेर्न माग गर्दा नपाएपछि ३१ गते विष सेवन गरेको पाइएको प्रहरी नायव निरीक्षक लेखनाथ आचार्यले जानकारी दिनुभयो ।

परीक्षाको नतिजा सार्वजनिक भए लगत्तै सञ्जुले प्रअ राई समक्ष उत्तरपुस्तिका हेर्न माग गर्दा नमिल्ने बताएको र सोही दिन सञ्जुको आमा नारायणी समेत उत्तरपुस्तिका हेर्न जादाँ नमिल्ने बताएपछि भोलि पल्ट ३१ गते विष सेवन गरेको प्रहरीको अनुसन्धानमा देखिएको छ । उक्त विद्यालयमा गएको वर्ष पनि एस.एल.सी परीक्षामा असफल भएपछि एक छात्राले विष सेवन गरी आत्महत्या गरेकी थिइन् ।