२० वर्ष पुराना थोत्रा गाडी रोक्दा काठमाडौंमा राम्रो प्रभाव

Posted on: March 01, 2017 | views: 521

काठमाडौं ।
सरकारले काठमाडौ उपत्यकामा २० वर्ष पुराना सार्वजनिक सवारी साधन सञ्चालनमा आजदेखि लगाएको रोकको प्रभाव राम्रो देखिएको यातायात व्यवस्था विभागले जनाएको छ ।

त्यस्ता २० वर्ष पुराना सार्वजनिक सवारी साधनको सञ्चालनबारे अनुगमन गर्न विभागले काठमाडौ उपत्यकाका विभिन्न स्थानमा गरेको अनुगमनका क्रममा एउटा ट्याक्सीमात्र सञ्चालन भएको भेटिएको विभागका प्रवक्ता डा। टोकराज पाण्डेले जानकारी दिनुभयो ।

प्रवक्ता डा। पाण्डेका अनुशार २० वर्ष पुराना सवारी सञ्चालनमा रोक लगाएको आज पहिलो दिन पुराना सवारी साधन धनीहरुले नियमको राम्रो पालना गरेको बताउनुभयो ।

आजदेखि २० वर्ष पुराना सार्वजनिक सवारी साधन सञ्चालनमा रोक लगाउन सरकारले गरेको निर्णय कार्यान्वयनका लागि यातायात व्यवस्था विभागको टोली, ट्राफिक प्रहरी लगायत सरोकारवाला फिल्डमै गई अनुगमन गरेका थिए ।

सार्वजनिक यातायातको साझा छाता संगठन नेपाल यातायात व्यवसायी राष्ट्रिय महासंघले सरकारले यातायात रोकमा विभेदपूर्ण ढंगले व्यवस्था लागु गरेको भन्दै असन्तुष्टि जनाएको छ ।