रुकुम स्ववियु चिर्वाचनमा प्रचण्ड माओवादीको अखिल क्रान्तिकारीको बर्चस्व

Posted on: March 01, 2017 | views: 386

रुकुम ।
स्वतन्त्र विद्यार्थी युनियनको चुनाव भएका क्याम्पसहरुमा अखिल क्रान्तिकारीहरुको नेतृत्व पाएको छ । रुकुमका ३ क्याम्पस मध्ये १ मा निर्वाचन, १ मा सहमतिमा नेतृत्व चयन भएको छ भने एउटा क्याम्पसमा स्थगित भएको छ ।

राडिज्युला शिक्षा क्याम्पस आठविसकोटमा निर्वाचन, मुसिकोट खलंगा बहुमुखी क्याम्पसमा सहमतिमा र जहारी क्याम्पस खोलागाउँमा चुनाव स्थगित भएको हो । राडिज्युला शिक्षा क्याम्पसमा नेकपा माओवादी केन्द्र निकट अखिल क्रान्तिकारीको प्यानल भारी मतका साथ विजयी भएको छ ।

५९ मतदाता मध्ये ४४ मत खसेकामा ३५ मत ल्याएर सभापतिमा क्रान्तिकारीका खुमराज ओली विजयी भए । उनका प्रतिद्धन्दी एमाले निकट अनेरास्ववियुका रमेश हमालले ६ तथा नेपाल विद्यार्थी संघका समिर शाहीले १ मत प्राप्त गरे । १ मत भने बदर भएको थियो ।

त्यस्तै सचिवमा २५ मतका साथ शसिराम भण्डारी र कोषाध्यक्षमा ३३ मतका साथ बिन्दु शाही निर्वाचित भएकी छन् । सदस्यमा ३३ मत ल्याएर विपना शाह, ३१ मत ल्याएर चाँदनी चन्द र ३२ मत ल्याएर आस्था मल्ल निर्वाचित भईन ।  

त्यस्तै मुसिकोट खलंगा बहुमुखी क्याम्पसको स्ववियु सभापतिमा माओवादी केन्द्र निकट अखिल क्रान्तिकारीका नारायण केसी निर्वाचित भएका छन् । जिल्लाका विद्यार्थी संघ संगठनविचको सहमतिमा केसी सभापतिमा निर्वाचित भएका हुन ।
उपसभापतिमा नेपाली कांग्रेस निकट नेविसंघका चिरञ्जिवि मल्ल, सचिवमा नेपाल कम्निष्ट पार्टी निकट अखिल क्रान्तिकारीका दिपक बिष्ट, सह सचिवमा एमाले निकट अनेरास्ववियुका तिलक पुन र कोषाध्यक्षमा माओवादी केन्द्र निकट अखिल क्रान्तिकारीका सृजना खड्का निर्वाचित भए ।

सहमतिका आधारमा अखिल क्रान्तिकारीले २ पदाधिकारी सहित ७ सदस्य, अनेरास्ववियुले १ पदाधिकारी सहित २ सदस्य, नेविसंघले र अखिल क्रान्तिकारीले १/१ पदाधिकारी र नयाँ शक्ति नेपाल निकट नयाँ शक्ति विद्यार्थी युनियनले १ सदस्य लिएका हुन् ।      

जहारी क्याम्पसमा भने असहज परिस्थितिका कारण चुनाव गराउने वातावारण नभएपछि चुनाव स्थगित गर्नुपरेको क्याम्पसले सूचना टासेर जानकारी दिएको छ । अव उक्त क्याम्पसमा चुनाव कहिले हुने भन्ने अन्यौल छ । जिल्लाका ४ ओटा क्याम्पसमा यसअघि नै अखिल क्रान्तिकारी निर्विरोध निर्वाचित भैसकेको छ भने शितल क्याम्पस चौरजहारीमा सहमतिमा नेतृत्व चयन भएको थियो ।

जिल्लाका सिम्रुतु शिक्षा क्याम्पस रुघाँ, सिस्ने शिक्षा क्याम्पस रुकुमकोट, स्यार्पू बहुमुखी क्याम्पस बाँफिकोट र सानिभेरी शिक्षा क्याम्पस सिमु्रतुमा अखिल क्रान्तिकारी यसअघिनै निर्विरोध विजयी भएको हो भने शितल क्याम्पस चौरजहारीमा अखिल क्रान्तिकारी, नेविसंघ र अनेरास्ववियुका विचमा भागबण्डाका आधारमा सहमतिमा स्ववियु नेतृत्व चयन गरिएको थियो ।

अहिले सम्म टुंगो लागेका जिल्लाका ७ ओटै क्याम्पसको स्ववियु सभापतिमा नेकपा माओवादी केन्द्र निकट अखिल क्रान्तिकारीका उम्मेदवार विजयी भएका छन् । निर्विरोध भएकामा सम्पुर्ण प्यानलनै विजयी भएको छ भने र सहमतिमा भएकामा पनि सभापतिमा भने अखिल क्रान्तिकारीकै उम्मेदवार विजयी भएका छन् ।