प्राधिकरणका तीन सञ्चालकको पक्षमा भएको अन्तरिम आदेश खारेज

Posted on: January 03, 2017 | views: 696

काठमाडौं,पुस १९ । नेपाल विद्युत प्राधिकरण तीन सञ्चालकलाई हटाउने निर्णय कार्यान्वयन नगर्न दिएको अन्तरिम आदेशलाई सर्वोच्च अदालत खारेज गरेको छ । मंगलबार प्रधानन्यायाधीश सुशीला कार्की र जगदीश शर्मा पौडेलको संयुक्त इजलासले यसको अन्तरिम आदेशलाई निरन्तरता दिनु नपर्ने फैसला सुनाएको हो । सर्वोच्चको यो आदेश पछि प्राधिकरणको बोर्ड बैठक पनि बसेको थिएनर, उनीहरुले पुनर्बहाली हुन पाएको थिएन । तीन सञ्चालक पुन काममा र्फकन नपाउँदै सर्वोच्चले यसअघि दिएको अन्तरिम आदेशलाई खारेज गरेको छ ।


यसअघि सर्वोच्चका न्यायाधीश प्रकाशमान सिंहको एकल इजलासले नेपाल विद्युत प्राधिकरणको बोर्डबाट हटाइएका तीनजना सदस्यहरुलाई हटाउने निर्णयलाई कार्यान्वयन नगर्न सर्वोच्च अदालतले अन्तरिम आदेश दिएउको थियो । उर्जा मन्त्रालयले नेपाल विद्युत प्राधिकरण सञ्चालक समिति सदस्य लक्ष्मणप्रसाद अग्रवाल, मनोजकुमार मिश्र र सुरज लामिछानेलाई लोडसेडिङ हटाउने अभियानमा वाधा गरेको भन्दै हटाएको थियो । मन्त्रालयको निर्णयविरुद्ध सदस्य लामिछानेले पुस १२ गते सर्वोच्चमा रिट दायर गरेका थिए ।

सञ्चालक समिति सदस्य अग्रवाल, मिश्र र लामिछानेले प्राधिकरणका प्रमुख कुलमान घिसिङलाई काम गर्न अवरोध गरेको भन्दै ऊर्जा मन्त्रालयले तीन सदस्यलाई हटाएर नयाँ सदस्य नियुक्त गरेको थियो ।