श्रीमतीको कुरुवा बसेका पत्रकार कर्ण बोहराको असामयिक निधन

Posted on: November 25, 2016 | views: 1209

१० मंसिर, काठमाडौं ।
चिन्ताजनक अवस्थामा उपचाररत श्रीमतीको कुरुवा बसेका पत्रकार कर्ण बोहरा कुरुवा बसेकै ठाउँमा मृत भेटिएका छन् ।

नेपाल पत्रकार महासंघ कञ्चनपुर जिल्ला शाखाका पूर्व सभापती समेत रहेका३६ वर्षीय बोहराको राजधानीको भेनस इन्टरनेशनल अस्पतालमा मृत्यु भएको हो ।

अस्पतालको अर्को बेडमा उपचार गराइएकी श्रीमतीको कुरुवा बसेका बोहरा सँगैको खाली बेडमा सुतेका थिए, तर उनी शुक्रबार दिउँसो अस्पतालको बेडमा मृत अवस्थामा फेला परेका हुन् ।

पत्रकार दीपक ओलीका अनुसार श्रीमतीको कुरुवा बसेका बोहरा दिउँसो १ बजे श्रीमतीको बेडनजिकैको अर्को बेडमा आराम गर्दै सुतेका थिए ।

करिव ३ बजे डाक्टरले उठ्न भन्दै बोलाउँदा बोहरा नउठेपछि उनलाई डाक्टरले उठाउने प्रयास गरेका थिए । तर उनको मृत्यु भइसकेको पाइएपछि उनकी श्रीमतीको अवस्था चिन्ताजनक बनेको छ ।

आफुलाई उपचार गर्न अस्पतालमा कुरुवा बसेका श्रीमान्कै मृत्युपछि अचेत बनेकी उनको श्रीमतीको हाल आइसियुमा उपचार भइरहेको छ ।

बझाङ स्थाय घर भएका पत्रकार बोहरा दुई दशकदेखी पत्रकारितामा संलग्न थिए । बोहराको निधनपछि उनका आफन्तजन आएपछि दाहसंस्कार गरिने भएको छ ।

पत्रकार कर्ण बोहराको निधनमा पत्रकार तथा पत्रकारिता पेशासँग आवद्ध सँगै विभिन्न संघसंस्था र व्यक्तिले सामाजिक सञ्जालमा श्रद्धाञ्जली व्यक्त गरेका छन् । पत्रकार बोहराको निधनमा दुख व्यक्त गर्दै उनको शवमा श्रद्धाञ्जली व्यक्त गर्न अस्पतालमा उपस्थित हुनेहरुको संख्या पनि बढेको छ ।

बोहराको असामयिक निधनको कारण खुल्न सकेको छैन । उनको शव पोष्टमार्टम गर्ने विषयमा समेत परिवारका सदस्यसँग सल्लाह भइरहेको अस्पतालले जनाएको छ ।