उपराष्ट्रपतिसँग जापानी राजदूतको भेटवार्ता

Posted on: November 18, 2016 | views: 743

टोकियो ।
उपराष्ट्रपति नन्दबहादुर पुनसँग नेपालका लागि जापानी राजदूत मासाशी ओगावाले   शिष्टाचार भेट गरेका छन् ।

उपराष्ट्रपतिको कार्यालय बहादुरभवन कान्तिपथमा उपराष्ट्रपतिसँग जापानका राजदूत ओगावाले आज शिष्टाचार भेट गरेका हुन् ।

भेटमा उपराष्ट्रपतिले नेपाल र जापानबीचको औपचारिक सम्बन्ध ६० वर्ष पूरा भए पनि दुई देशबीचको सम्बन्ध निकै पूरानो भएको बताएका छन् ।

उपराष्ट्रपती पुनले नेपाल जापानबीचको सम्बन्ध जनस्तरसम्म विस्तार भएको र दुई देशबीचको सम्बन्धलाई अझै प्रगाढ बनाउनुपर्नेमा जोड दिएको उपराष्ट्रपतिको कार्यालयले जनाएको छ ।

उपराष्ट्रपतिले जापानी सहयोग नियोग ९जाइका०को ऋण सहयोगमा बन्न लागेको नागढुंगा सुरुङ मार्ग नेपालको लागि महत्वपूर्ण परियोजना भएको बताउँदै छिटो भन्दा छिटो निर्माण प्रक्रिया सुरु गर्न आग्रह गरेका थिए ।

नेपाल र जापानबीच दौत्य सम्बन्ध सुरु भएको ६० औँ वर्षगाँठको अवसरमा शनिबार नेपाल र जापानबीच मैत्रीपूर्ण फुटबल हुन लागेकोमा उपराष्ट्रपतिले खुशी समेत व्यक्त गरेका थिए ।

उपराष्ट्रपतिसँगको भेटमा नेपालका लागि जापानका राजदूत ओगावाले जापान र नेपालबीचको दौत्य सम्बन्ध स्थापना भएको ६० औँ वर्षगाँठ चलिरहेकोले यो वर्ष दुवै देशका लागि विशेष वर्ष रहेको बताएका छन् ।

जापानी राजदूतले नागढुंगा सुरुङ मार्ग निर्माण प्रक्रिया चाँडै सुरु हुने भन्दै सुरुङ मार्ग निर्माणका लागि जापान सरकारले अनुमोदन गरिसकेको बताउँदै चाँडै निर्माण प्रक्रिया सुरु हुने बताए  ।

भेटमा राजदूत ओगावाले नेपालले केही दिन अघि मलेसियामा सम्पन्न एएफसी सोलिडारिटी कपको उपाधी जितेकोमा बधाई दिएका थिए । हाल नेपालको लागि फुटवल प्रशिक्षको रुपमा जापानी नागरिक रहेका छन् ।

राजदूतले जापान र नेपालको दौत्य सम्बन्ध स्थापनाको ४० औँ वर्षगाँठको अवसरमा शनिबार जापान र नेपालबीच हुने मैत्रीपूर्ण फुटबल रोमान्चक हुने बताए ।

खेलकूदले सबै पक्षलाई एउटै छातामुनी ल्याउने बताउँदै उनले नेपालजस्ता विविधतायुक्त देशमा खेलकूदको विकास गर्नुपर्ने बिचार व्यक्त गरेका थिए ।