अर्बौंको सम्पत्ति भएको सुजातालाई ५० लाखको लालसा,कति छ वास्तविक सम्पत्ति ?

Posted on: November 14, 2016 | views: 5678

२९ कात्तिक,काठमाडौं । सत्तारुढ दल नेपाली कांग्रेसको नेतृ सुजाता कोइराला भूतपूर्व उपप्रधानमन्त्री तथा परराष्ट्र मन्त्री हुन । उनी नेपालका भूतपूर्व प्रधानमन्त्री स्व। गिरिजा प्रसाद कोइराला तथा सुष्मा कोइरालाकी एक मात्र सन्तान हुन । सुजताले विदेशमै अध्ययन गरी विदेशमै विवाह गरेकी हुन् । यौवन उमेर विदेशमा शयर गरी जर्मनी नागरिकसँग विवाह नै गरेकी सुजाताले आफ्नी छोरीसमेत विदेशीलाई नै दिएकी छन् । सुजाताकी छोरी ज्वाईँ बंगलादेशी नागरिक रुवेल चौधरी बेलाबेलामा विवादमा आउने ब्यक्ति पनि हुन् । माधव नेपाल नेतृत्वको सरकारको पालामा उपप्रधानमन्त्री तथा परराष्ट्रमन्त्रीसमेत रहेकी कोइरालाको सम्पत्तिबारे सरकार अनभिज्ञ रहेको हो ।

मन्त्री हुँदा उनले सरकारी नियम उल्लंघन गर्दै सम्पत्ति विवरण बुझाइनन् । जसबापत उनले पाँच हजार जरिवाना तिरिन् । पहिलो संविधानसभामा सभासद् हुँदा पनि उनले सम्पत्ति विवरण बुझाएकी थिइनन् ।

त्यसवापत पनि उनले जरिवाना तिरिन् । लामो समय विदेशमै रमाएकी सुजता ०४६ सालको राजनीतिक परिवर्तनपछि मात्रै नेपाली राजनीतिमा उदाएकी हुन् । उनी नेपाली कांग्रेसको केन्द्रीय सदस्य छिन् ।

विराटनगरमा प्रशस्त जमीन रहेको सुजाताको काठमाडौंको मण्डिखाटारमा आफ्नो आलिसान महल छ । पार्किङ सुविधासहितको मण्डिखाटार निवासबाटै उनले कांग्रेसभित्रको छुट्टै पार्टी चलाउने गर्छिन् ।

झण्डै करोड रुपैयाँ पर्ने विलासी गाडीमा हिड्ने सुजाताले आफ्नो सम्पत्ति विवरण भने राज्यको महत्वपूर्ण निकायमा हुँदासमेत सार्वजनिक गरिनन् ।

बिराटनगर उपमहानगरपालिका ९ नम्बर वडा र बखरीमा सुजाताका नाममा अहिले १४ विघा जमिन छ । तराईमा चलन चल्तीमा रहेको जग्गा नाप विधिमा एक विघामा २० कठ्ठा जमिन हुन्छ ।

विराटनगर उपमहानगरपालिका घडेरी किनबेचमा देशकै सबैभन्दा महंगो स्थानमा पर्छ । काठमाडौको न्यूरोड, दरबारमार्ग क्षेत्रका केही रोपनी नेपालकै सबैभन्दा महंगो जमिनमा पर्न सक्छ । त्यसपछि विराटनगर उपमहानगरपालिका घडेरीका लागि सबैभन्दा महंगो ठाउँ हो ।

त्यस्तो महंगो ठाउँमा सुजाताका नाममा कम्तिमा १५ विघा १४ कठ्ठा जमीन रहेको छ । तराईको एक कठ्ठा जमिन भनेको पहाडको १ रोपनीभन्दा बढी क्षेत्रफलको हो ।

विराटनगरमा रहेर पत्रकारिता गरिरहेका संचारकर्मी महाप्रसाद खतिवडाका अनुसार विराटनगर उपमहानगरपालिकाभित्र पर्ने त्यस ठाउँको जमीनको मूल्य अहिले कम्तिमा पनि एक विघा बराबर ९० लाख देखि १ करोडसम्म पर्छ । त्यहाँको जमिनको अनुमानित मूल्यबारे खतिवडा भन्छन्, ‘तत्काल घर बनाएर बस्न नमिल्ने, धान रोप्नमात्र मिल्ने जमिनलाई पनि कम्तिमा प्रतिबिघा ९० लाख देखि १ करोड पर्छ । सुजाताका नाममा रहेको त्यस क्षेत्रको जमिनको मूल्य निकै महंगो क्षेत्र हो ।’

नेतृ सुजाताको जग्गा भएको वडा नम्बर ९ अर्थात वखरी भन्ने ठाउँ बस्ती बस्न अर्थात घडेरीमा विक्री हुने क्षेत्रमा पर्छ । भौतिक पूर्वाधारका दृष्टिकोणले तिव्र विकास भइरहेको त्यस क्षेत्रको जमिनको मूल्य एकविघा बराबर कम्तिमा पनि १ करोड ५० लाख जति पर्न जान्छ । सुजाता कोइराला आफैँले हस्ताक्षर गरेर बुझाएको सम्पत्ति विवरणमा उनले लेखेकी छिन्, ‘पिताजी स्वर्गीय गिरिजाप्रसाद कोइरालाबाट नामसारी गरिएको १४ विघा ।’

यसको अतिरिक्त उनको नाममा विराटनगर उपमहानगरपालिका वडा नम्बर १५ मा थप १५ कठ्ठा ९ धुर जमिन छ । बखरी क्षेत्रको भन्दा वडा नम्बर १५ मा रहेको १५ कठ्ठा जमिन निकै महंगो मूल्य पर्ने जमिन हो ।

यति मात्र होइन, सुजाता कोइरालासँग विराटनगरमै थप जमीन छ । मोरङ उपमहानगरपालिका वडा नम्बर ३ मा थप ८ कठ्ठा, १० धुर जमिन छ ।

मोरङ्गकै डाइनिया गाविस वडा नम्बर ६ को कित्ता नम्बर ३९ मा ११ कठ्ठा १५ धुर जमिन छ । यसै गाविसको वडा ७ मा कित्ता नम्बर ४० मा फैलिएको २ कठ्ठा १२ धुर जमिन छ । त्यसै क्षेत्रमा कित्ता नम्बर ४२ मा ४ कठ्ठा १२ धुर थप जमिन छ भने त्यहीँ कित्ता नम्बर ४९ मा १२ कठ्ठा १४ धुर अर्को प्लट छ ।

कोइरालाका नाममा करिब १५ विघा १४ कठ्ठा जमिन देखिन्छ । सामान्यतः सबैभन्दा कमजोर भौतिक पूर्वाधार भएको जमिनको समेत कम्तिमा पनि एक विघा बराबर एक करोड मूल्य पर्छ । योमध्ये नेतृ कोइरालाको करिब २ विघा जमिन निकै महंगो मूल्य पर्ने संरचनामा फैलिएको छ । यी जमिनको विवरण सुजाता कोइरालाले आफै सार्वजनिक गरेकी हुन् ।

२५ करोडको जमिनमा एक करोडको घर

कोशी अञ्चल अस्पतालको ठीक अघि एउटा विशाल सेतो घर छ । करिब ८ कठ्ठाको क्षेत्रफलभित्र पर्खालले घेरिएको उक्त घर नेतृ सुजाता कोइरालाको आफ्नै नाममा छ । सुजाता बिराटनगरमा रहँदा त्यही घरमा बस्ने गर्छिन् । सञ्चारकर्मी धु्रव भट्टराईका अनुसार कम्तिमा पनि त्यो घरको मूल्य १ करोड भन्दा बढी पर्छ । घर वरपर फैलिएको ८ कठ्ठा जमीनलाई कम्तिमा पनि २५ करोड बराबर मूल्य पर्छ । सुजाताको घर भएको त्यस ठाउँमा जमिनको मूल्य धुरकै कम्तिमा ३० लाख रहेको छ ।

-अनलाइन खबर