घुस खाने सप्तरीका प्राविधिक सहायकविरुद्ध मुद्दा दायर

Posted on: July 10, 2016 | views: 326

२६ असार, सप्तरी ।
अख्तियार दुरुपयोग अनुसन्धान आयोगले जिल्ला शिक्षा कार्यालय सप्तरीका प्राविधिक सहायक वीरेन्द्र कुसियतविरुद्ध आज विशेष अदालतमा मुद्दा दायर गरेको छ ।

आयोगका प्रवक्ता कृष्णहरि पुस्करका अनुसार प्राविधिक सहायक कुसियतले राष्ट्रिय प्राथमिक विद्यालय, सप्तरीमा कार्यरत शिक्षक मनोजकुमार यादवसँग जिल्लान्तर सरुवा सहमति दिएबापत रु ४० हजार घुस लिँदालिँदै केही दिन पहिले पक्राउ परेका थिए ।

यस्तै, आयोगले जिल्ला विकास समिति कार्यालय, कैलालीको विकास समितिअन्तर्गतको खरिदार पदमा कार्यरत गुनसिंह चौधरीले पेस गरेको शैक्षिक योग्यताको प्रमाणपत्र नक्कली रहेको पाइएकाले विशेष अदालतमा मुद्दा दायर गरेको छ ।

चौधरीले दीपेन्द्र मावि कैलालीबाट २०४५ सालमा प्रवेशिका परीक्षा उत्तीर्ण गरेको भनी पेस गरेको शैक्षिक योग्यताको प्रमाणपत्र नक्कली पाइएकाले हदैसम्मको कारबाहीको माग गरिएको छ ।

रकम लिएर फरार सचिव प्रहरीको फन्दामा

सामाजिक सुरक्षा भत्ता बापतको रकम लिएर बेपत्ता मलेकपुर गाविसका  सचिव प्रदीप कर्णलाई प्रहरीले आज पक्राउ गरेको छ ।

 कर्णले चार महिनादेखि सामाजिक सुरक्षा भत्ता वितरण नगरेपछि जिविस सप्तरीले उनलाई निलम्बन गरी पक्राउ गर्न प्रहरीलाई आग्रह गरेको थियो ।  सचिव कर्ण रु २३ लाख ९५ हजार अघिल्लो किस्ताको रकम वितरण नगरी लामो समयदेखि फरार थिए  ।  

गाविसका वृद्धवृद्धाले आफूहरुले सामाजिक सुरक्षा भत्ता नपाएको भन्दै शुक्रबार जिविस सप्तरीमा विभिन्न पदाधिकारीसँग भत्ता उपलब्ध गराउन माग गरेका थिए ।