नक्कली चिकित्सक प्रकरणः प्रमाण एकै, आदेश भिन्न

Posted on: July 07, 2016 | views: 341

काठमाडौं,असार २३ । आईएस्सीको नक्कली प्रमाणपत्रका आधारमा चिकित्सक बनेको अभियोगमा पक्राउपछि ५ लाख ५८ हजार बिगो कायम भएका महेश्वर राय यादवका नाममा जिल्ला अदालत कास्कीले ७ लाख धरौटी माग्दा राख्न नसकी जेल गए। एकै प्रकृतिको अभियोगमा ४६ लाख २१ हजार र १३ लाख ६३ हजार रुपैयाँ बिगो कायम भएका निलिमा खड्का महत र राहिल फराज अन्सारी काठमाडौं जिल्ला अदालतको आदेशमा तारेखमा मुक्त भए। कान्तिपुर दैनिकमा समाचार छ। 

 महतमाथि बीडीएस गरेर दन्त चिकित्सकका रुपमा वीर अस्पलात, हेल्दी डेन्टल क्लिनिक र आम्दा नेपाल अस्पतालमा काम गरेर ४६ लाख ठगी गरेको प्रहरीको केन्द्रीय अनुसन्धान ब्युरोको अनुसन्धानमा खुलेको थियो। चीनवाट एमबीबीएस गरेर कान्तिपुर अस्पताल सीतापाइलमा कार्यरत अन्सारी नक्कली चिकित्सक बनेर १३ लाख ६३ हजार ठगी गरेको अनुसन्धानको निष्कर्ष थियो। 

 नक्कली प्रमाणपत्र खुलेका १ सय ९ चिकित्सकमध्ये पक्राउ परेका ३७ चिकित्सकविरुद्ध ब्युरोले अनुसन्धान सकाएपछि प्रहरी अनुसन्धानलाई आधार बनाएर मुद्दा दायर गरेको थियो। प्रहरीले जुटाएको प्रमाण र बिगो कायम गर्दा अपनाएको पद्धतिसमेत समान भएपनि  थुनछेक बहसपछिको आदेश भने समान भएन।