द्धन्दकालमा माओवादीले लुटेको ७ लाख फिर्ता गर्न माग

Posted on: July 06, 2016 | views: 339

२२ असार, पर्वत ।
पर्वतका एक द्वन्द्वपिडितले द्वन्द्वकालमा लुटिएको रकमको क्षतिपुर्तिको माग गरेका छन् । दक्षिण पर्वतको बेउलीवास गाविसका सचिब पुण्यप्रसाद काफ्लेले २०६१ साल साउन ३ गते तत्कालीन नेकपा माओवादीद्धारा लुटिएको रकमको क्षतिपुर्ति माग गर्नुभएको हो ।

बेउलीवास र उरामपोखरा गाविसमा कार्यरत रहँदा दुईवटा गाविसको विकास निर्माणको रकम भुक्तानीका लागि सदरमुकाम कुश्माबजार लिएर गएको ९ लाख ७५ हजार रुपैया र महत्वपुर्ण कागजात माओवादी कार्यकर्ताहरुले बाटोमा लुटेका थिए । झण्डै २० जनाको समुहमा आएका माओवादी कार्यकर्ताहरुले रकम लुटेर लगेको उहाँले बताउनुभयो ।

रकम लुटिएपछि २०६१ साल असोज ४ गते जिल्ला विकास समिति र जिल्ला प्रशासन कार्यालयमा जानकारी गराएको भएपनि अहिलेसम्म कुनै क्षतिपुर्ति र रकम फिर्ता नपाएको गुनासो गरेका छन् । १२ वर्षसम्म उक्त रकमको क्षतिपुर्ति नपाउँदा आफु घरवारबिहीन हुने अवस्थामा पुगेको काफ्लेले गुनासो गर्नुभएको छ ।


गाउँ विकास समितिको रकम भएपनि विभिन्न उपभोक्ता समिति, आमा समुह, लक्षित वर्गको रकम भएकाले आफुले ऋण खोजेर भुक्तान गरेको उहाँले बताउनुभयो । उहाँले लुटिएको रकम असुल गर्नकै लागि ८ मुरी धान फल्ने जग्गा विक्रि गरे, अझै धेरै ऋण बाँकी रहेको बताउनुभयो ।

क्षतिपुर्तिका लागि गृह मन्त्रालय, शान्ति तथा पुर्न्निर्माण मन्त्रालय, अर्थ मन्त्रालय र प्रधानमन्त्रीको कार्यालयमा पुगेर पटक पटक माग गर्दापनि द्वन्द्वकालमा लुटिएको वा सम्पत्ती क्षति भएकालाई क्षतिपुर्ति स्वरुप रु १० हजार रुपैया मात्रै दिने आश्वासन पाएपछि उक्त रकम आफुले नलिईकन फर्किएको काफ्लेले गुनासो गर्नुभयो ।