२ लाख ५० हजारमा कुबेतमा नेपाली युवती बेच्न लैजाँदै गरेका छ जना पक्राउ

Posted on: June 05, 2016 | views: 572

२४ जेठ, काठमाडौं ।

महानगरीय प्रहरी अपराध महाशाखा काठमाडौले मानव बेचबिखनको आरोपमा छ जनालाई पक्राउ गरेको जनाएको छ ।

महाशाखाबाट खटिएको टोलीले चार महिलालाई काँकरभित्ता हुँदै कुबेत लगेर बेच्ने गरेको सूचना पाएपछि खोजतलास गर्दै जाँदा शुक्रबार र शनिबार मोरङ, र सुनसरी जिल्लाबाट उनीहरुलाई पक्राउ गरेको हो ।

पक्राउपर्नेमा बालकुमारी विश्वकर्मा, बिना तामाङ, नवीन धिमाल, जीवन उराउ, अशोक तामाङ र रुपनारायण राजवंशी रहेका छन् ।

महाशाखाका प्रहरी नायब उपरीक्षक मुकुन्द मरासिनीले नेपाली र भारतीय व्यक्तिको मिलेमतोमा बाहिर लगेर बेच्न लागेको सूचना पाएपछि खोजतलास गरी दोषीलाई पक्राउ गरिएको जानकारी दिनुभयो ।

उहाँले एक व्यक्ति पठाएबापत दुई लाख ५० हजार रुपैया लिने गरेको अनुसन्धानमा खुल्न आएको बताउनुभयो ।