दुई समाजसेवीबाट आमाको माया छात्राबासलाई खाद्यान्न सहयोग

Posted on: April 22, 2020 | views: 1033

विदुर । विदुर नगरपालिका वडा नंं २ स्थित ‘आमाको माया छात्राबास’लाई दुई समाजसेवीहरुले पुग्ने खाद्यान्न सहयोग उपलब्ध गराएका छन् ।

विदुर नगरपालिका वडा नं. ४ निवासी समाजसेवी रुक्मेणी सेढाई र उहाँको साथी गुल्मी जिल्ला घर भएर अहिले अमेरिकामा बस्दै आउनुभएका कोपिला गौतमले ‘आमाको माया’ छात्रावासमा आश्रित बालकहरुको लागी आज खाद्यान्न सामाग्रि बालगृहका सञ्चालक सोमप्रसाद पाण्डेलाई हस्तान्तरण गर्नुभएको हो ।


अमेरिका निवासी कोपिला गौतमले उपलब्ध गराउनुभएको चामल ११ बोरा, तेल एक बाकस, दाल एकबोरा, मस्यौरा एक बोरो प्रदान गरिएको हो । यसैगरी, बट्टार निवासी जयगणेश सहकारी सँस्थाका शेयर सदस्य समेत रहनुभएका समाजसेवी रुक्मेणी सेढाई मार्फत दुई सिलिण्डर ग्याँस र एक बाकस विस्कुट बालगृहलाई उपलब्ध गराउनुभएको हो । बट्टार निवासी समाजसेवी रुक्मेणी सेढाईले बालगृहमा आश्रित बालगृहको लागी सहयोग पु-याउन अमेरिकी निवासी आफ्नो साथी मार्फत समेत सहयोग उपलब्ध गराएर अभिभावक नभएका तथा भएर पनि खान र बस्ने वातावरण नभएका बालबालिकालाई सहयोग गर्ने उद्देष्यले आमाको माया छात्राबासलाई सहयोग गरेको बताउनुभएको छ । 


छात्राबासका बालबालिकालाई खाद्यान्न सामाग्रि सहयोग प्रदान गर्न रेडियो चिम्टेश्वरका अध्यक्ष तथा जयगणेश सहकारी सँस्थाका सचिव प्रकाशकुमार अधिकारी, नेपाली काँग्रेस नुवाकोट क्षेत्र नं. २ का सभापति जगतबहादुर तामाङ, वडा नं .२ का वडासदस्य राधाकृष्ण भण्डारी लगायतको सहभागिता रहेको थियो । दाताहरुबाट प्राप्त भएको खाद्यान्न र ग्याँसले बालगृहमा अहिले आश्रित २४ जना बालकहरु रहेकाले उनीहरुको लागी दुई महिनाको लागी राहत पुग्ने बालगृहका सञ्चालक सोमप्रसाद पाण्डेले बताउनुभएको छ । जनजाती कल्याण आश्रम नेपाल मार्फत सञ्चालित नुवाकोट जिल्लाकै एकमात्र बालगृह ‘आमाको माया छात्रावास’लाई सरकारी सहयोग प्रभावकारी नहुदाँ दाताले उपलब्ध गराएको सहयोगबाट सञ्चालनमा रहेको छ ।