बलात्कारको मुद्दा खेपिरहेका ‘सिद्ध बाबा कृष्णदास’ सुटुक्क गए भारत

Posted on: January 23, 2020 | views: 315

काठमाडौ । आफ्नै अनुयायीमाथि बलात्कारको अभियोगमा मुद्दा खेपिरहेका ‘सिद्ध बाबा कृष्णदास’ भनिने कृष्णबहादुर गिरी भारत गएका छन्।  उच्च अदालत विराटनगरमा जबर्जस्ती करणीअन्तर्गत थुनछेकको सुनवाइ चलिरहेका बेला उनी प्रहरी हवल्दार तहका आफ्ना सुरक्षागार्ड मुकेश शाहलाई नेपालमै छाडेर भारत गएका हुन्। प्रहरी स्रोतका अनुसार अभियुक्त गिरी मध्याह्न १२:३० बजे विराटनगरबाट जोगबनी गएका थिए। उनी विराटनगरबाट जोगबनीसम्म आफैँले चढ्दै आएको ग १ च ८१५७ नम्बरको गाडी चढेर गएका हुन्। जोगबनीको मध्य बजार पुगेपछि नेपाली नम्बरको आफ्नो गाडी छाडेर भारतीय नम्बर प्लेट भएको गाडी चढेर हुइँकिएको प्रहरी स्रोतको दावी छ।

सुनसरीका एसपी यज्ञविनोद पोखरेलले कृष्णदासको सुरक्षामा रहेका प्रहरी हवल्दारले उनलाई जोगबनी जान लागेका बेला पक्रन नसक्ने बताए।  ‘उहाँलाई थुन्न होइन, उहाँको सुरक्षाका लागि प्रहरी सुरक्षाकर्मी दिइएको हो’, एसपी पोखरेलले भने, ‘प्रहरीले उहाँलाई रोक्न मिल्दैन।’ उनले थपे, ‘उहाँ यसअघि पनि एक पटक भारत गएर आइसक्नु भएको छ। उपचारका लागि गएको समाचार हामीले पाएका छौँ।’

कृष्णदास बिहीवार बिहान उच्च अदालत जाने भन्दै सुनसरीको चतरास्थित आफ्नो आश्रमबाट निस्किएका थिए।

कृष्णदासका भक्त र अनुयायी पनि उनी थप उपचारका लागि भारत गएको स्पष्टीकरण दिन थालेका छन्।

जबर्जस्ती करणीको जाहेरी परेपछि उनी मंसिर १२ गते विराट नर्सिङ होममा भर्ना भएका थिए। त्यहाँ उनी ३८ दिन बसे। सुनसरी जिल्ला अदालतले उनलाई ३ लाख धरौटीमा रिहा गरेको थियो।