दर्शनार्थी चढेको मिनीट्रक दुर्घटना हुदाँ सातको मृत्यु

Posted on: January 22, 2020 | views: 350

धादिङवेसी । धादिङको ज्वालामुखी गाउँपालिका वडा नं .४ ढोलामन्डली मन्दिर दर्शन गरेर फर्केएिका दर्शनार्थी चढेको मिनी ट्रक दुर्घटना हुँदा सात जनाको मृत्यु भएको छ । दुर्घटनामा २५ जनाभन्दा बढी घाइते भएको धादिङ प्रहरीले बताएको छ । मृत्यु हुनेमा तीन जनाको घटनास्थल र चार जनाको उपचारको क्रममा धादिङ अस्पतालमा मृत्यु भएको हो । 

दुर्घटनामा मृत्यु हुनेहरुमा नीलकण्ठ नगरपालिका वडा नं. २ भुलभुलेका बिदुर गुरुङ, ध्वजबहादुर गुरुङ, सुनिल भनिने तिलक बहादुर गुरुङ, पूर्णमान श्रेष्ठ, प्रेम बहादुर गुरुङ, बलबहादुर गुरुङ र सेते गुरुङ रहेको अस्पताल प्रमुख डाक्टर नीति प्रसाईले विज्ञप्ती मार्फत जानकारी दिनुभयो । 

दुर्घटनामा परेर घाइते भएका मध्ये ११ जनालाई नेपाली सेनाको हेलिकप्टेर मार्फत र चार जनालाई एम्बुलेन्स मार्फत काठमाडौ लगिएको धादिङका प्रहरी प्रमुख रविन्द्र रेग्मीले जानकारी दिनुभयो । घाइते मध्ये ८ जना सामान्य उपचार पश्चात घर फर्किएका छन् भने बाँकी १५ जनाको जिल्ला अस्पताल धादिङमा नै उपचार भइरहेको छ । धादिङको निलकण्ठ नगरपालिका वडा नं .८ मैदीभञ्जाङमा ग.१ ख ८०१२ नम्बरको मिनीट्रक सडकमै अनियन्त्रित भएर दुर्घटनामा परेको हो । 

 घटनास्थलमा नेपाल प्रहरी र स्थानीयबासीले घाइतेको उद्धार गरेर अस्पताल पठाएका थिए । घाइते मध्ये १५ जनाको अबस्था गम्भीर रहेकाले उनीहरुलाई थप उपचारको लागी नेपाली सेनाको हेलिकोप्टर मार्फत काठमाडौ पठाइएको प्रहरीले जनाएको छ । मन्दिरमा पूजा पश्चात चालक सहित सबैले मादक पदार्थ सहित प्रसाद एंव खाएर फर्कदै गर्दा दुर्घटनामा परेको थियो । दुर्घटनाको समयमा मिनीट्रकमा ४५ जना यात्रु रहेको पाइएको छ । 

यसैबीच, धादिङको गजुरी गाउँपालिका वडा नं. ६ बान्छेटारमा ना. ६ ख ७००३ नम्बरको ट्रकका चालक ट्रक भित्रै मृत भेटिएका छन् । रुपन्देही घर भएका ३० वर्षीय सूर्यप्रसाद थारु ट्रकभित्रै मृत भेटिएको इलाका प्रहरी कार्यालय गजुरीले जनाएको छ । ट्रकका सह–चालक कपिलवस्तुका सिमोन थारु आवश्यक अनुसन्धानको लागी प्रहरीले नियन्त्रणमा लिएको छ ।