उघ्रियो मौसम, लाग्यो घाम 

Posted on: January 19, 2020 | views: 275

विदुर । पश्चिमी बायुको प्रभावले बिहीबारदेखि सुरु भएको माघेझरी उघ्रिएको छ । हिजो बिहानैदेखि बादलले आकाश ढाकेपनि वर्षा रोकिएको थियो भने दिउसोँ केही समय घाम लागेकाले लगातारको झरीका कारण कष्टकरण भएको जनजीवन सामान्य भएको छ । पानीको कारण दुईदिनसम्म प्रभावित भएको जनजीवन मौसम अनुकुल भएसगैँ हिजोदेखि नै चलपहल बाक्लो भएको हो ।
हिजो अपरान्हदेखि आकाश खुला भएको मौसम पुर्वअनुमान महाशाखाले जनाएको छ । बिहीबार र शुक्रबार वर्षा र हिमपात गराएको पश्चिमी वायु कमजोर हुँदै गएकाले हिजो देखि नै मौसम खुला भएर आज पारिलो घाम लाग्ने मौसमविद् विभूति पोख्रेलले जानकारी दिनुभएको छ । 
मौसम खुला भएसगै दुई दिनदेखि रोकिएको दैनिक कामकाजको लागी हिजोदेखि नै सहज भएको छ । बजार क्षेत्रमा किनमेल गर्ने तथा आउजाउ गर्नेको सङ्ख्या बाक्लो देखिएको थियो भने गाउँघरमा खेतीपाती, घाँसदाउरा सहित दैनिक कामकाजमा किसानहरु व्यस्त देखिएका थिए । 
बिहीबार अपरान्हदेखि सुरु भएको बर्षा सहित माथिल्लो क्षेत्रको हिमपातले नुवाकोट, रसुवा, धादिङ, गोरखा सहित मुलुकभरका जनजीवन प्रभावित भएको थियो ।
लगातार दुई दिनको झरीले बालबलिका तथा बृद्धबृद्धालाई निकै कठिनाई भएकोमा लाग्न सुरु भएको घामको तापले हिजोदेखि नै राहत महशुस भएको छ ।