नेपाल एकीकरणसंग जोडिएका इतिहास तथा सम्पदा र सँस्कृतिमा सेनाको चासो

Posted on: January 17, 2020 | views: 256

रामहरि न्यौपाने,

विदुर । नेपाल एकीकरणको क्रममा श्री ५ बडामहाराजधिराज पृथ्वीनारायण शाह तथा गोर्खाली फौज हिडेका हिँडेको बाटोलाई ‘एकीकरण पदयात्रा’ तथा त्यस समयमा निर्माण भएका संरचनाको संरक्षण तथा प्रबद्धनको लागी नेपाली सेनाको मुख्यालय भद्रकाली काठमाडौमा हिजोदेखि छलफल सुरु भएको छ । सातवटै प्रदेसमा पर्ने गोर्खाली फौज हिडेका पदयात्रा, त्यस समयमा निर्माण भएका संरचनाको खोजी गरेर संरक्षणको लागी छलफल तथा भावी रणनीति तय गर्न छलफल सुरु भएको जबरजंग गण नुवाकोटका गणपति उदयबहादुर लामिछानेले जानकारी दिनुभएको छ ।

पहिलो दिन हिजो जबरजंग गणका गणपति लामिछानेले नेपाल एकीकरणको सुरुवात नुवाकोटमाथी पहिलो बिजयीबाटै काठमाडौ उपत्यका प्रवेश गरेको जानकारी सहितको गोरखा–धादिङ र नुवाकोटमा रहेका त्यस समयको संरचनाको अबस्थाको बारेमा ‘नेपाल एकीकरण पहिलो पाइला : नुवाकोट विजयी’ शिर्षकको प्रस्तुतीकरण मार्फत सहभागीलाई जानकारी गराउनुभएको छ । उहाँले एकीकृत नेपालको पहिलो बिजयी नुवाकोटमाथी भएको, नुवाकोट हुदै गोर्खाली फौज काठमाडौ प्रवेश गरेको,२५ वर्षसम्म नेपालको राजधानी नुवाकोटमै रहेको तथा उपत्यकालाई कमजोर बनाउदै नुवाकोट जिल्ला नाकाबन्दीको लागी समेत महत्वपूर्ण भूमि भएकले कुटनीतिक तथा सामरिक दृष्टिकोणाले महत्वपूर्ण रहेको उल्लेख गर्नुभएको छ ।

प्रमुख सेनानी लामिछानेले गोरखाहुदैँ काठमाडौसम्म पृथ्वीनारायण शाह तथा गोर्खाली फौज हिडेको ‘रुमाले २६ कोष’मा को पदमार्गको अबस्था, यस क्षेत्रमा पर्ने गढी, दरबार, मठमन्दिर, पाटी–पौवा, धारा, विश्रामस्थल, सैनिक तालीम स्थल लगायतको संरचनाको जानकारी गराउनुभएको छ ।

नेपाली सेनाको मुख्यालयमा आयोजित कार्यक्रममा नेपाली सेनाका प्रमुख प्रधानसेनापति महारथी पूर्णचन्द्र थापा, नुवाकोट जिसस प्रमुख सन्तमान तामाङ, विदुर नगरपालिका वडा नं. २ का वडाध्यक्ष बिरेन्द्रकुमार शाही, वडा नं. १० का वडाध्यक्ष गणेशकुमार नेपाल लगायत सातै प्रदेसबाट प्रतिनिधित्व गर्ने जनप्रतिनिधि, ईतिहासविद, सस्कृतिविद् लगायतको सहभागिता रहेको छ ।

हिजोदेखि सुरु भएको छलफलमा आज बन्द सत्र चल्ने र पर्सि आइतबार भावी रणनीति तय गर्दै घोषणपत्र माफर्त नेपाल एकीकरणसंग जोडिएका संरचना तथा सम्पदाको संरक्षण तथा प्रबद्धनमा जोड दिइने लक्ष्य राखिएको छ । उपप्रधान तथा रक्षा मन्त्री इश्वर पोखरेलको प्रमुख आतिथ्यतामा समापन हुने कार्यक्रममा ‘एकीकरण पद मार्गको समग्र दीर्घकालीन योजना तथा आगामी आर्थिक वर्षको लागी नेपाल सरकारको नीति तथा योजना र बजेटमा समावेश गर्ने कार्यक्रमको प्रस्ताव’ सम्बन्धिको प्रस्तुतीकरण समेत रहेको नेपाली सेनाले जनाएको छ । 

एकीकरण पद मार्गको प्रचार एंव संरक्षणको लागी नेपाली सेनाले पुस १८ देखि गोरखाबाट धादिङ, नुवाकोट हुदै काठमाडौसम्म ‘एकीकरण टर्च’ -याली समेत सञ्चालन गरेको थियो ।