राउतवेशीमा आयोजित आँखा जाँच शिविरमा करीब चार सयको परीक्षण

Posted on: January 04, 2020 | views: 280

समुन्द्रटार । दुप्चेश्वर गाउँपालिकाको वडा नं. ३ राउतवेशीमा आयोजना गरिएको निःशुल्क आँखा जाँच तथा परीक्षणमा करीब चारसय जनालाई सेवा प्रवाह गरिएको छ । 

नेपाल रेडक्रस सोसाइटी नुवाकोट शाखा र तिलगंगा आँखा प्रतिष्ठान गौशालाको सयुक्त सहकार्यमा जिल्ला सामुदायिक आँखा केन्द्र नुवाकोटले राउतवेशी स्वास्थ्य चौकीमा शुक्रबार आयोजना गरेको शिविरमा ४० जना र कौकेश्वरी माविमा रहेका साढे तीनयस विद्यार्थी गरेर करीब चारसय जनाको आँखा जाँच गरिएको केन्द्रका प्रमुख शंकर अधिकारीले जानकारी दिनुभएको छ । उहाँको अनुसार शिविरमा जाँच गर्न आएका मध्ये तीन जनामा मोतियाबिन्दु लागेको पाइएको छ । मोतियाबिन्दु देखिएका बिरामीको लागी यही पुस २५ र २६ गते बट्टारमा आयोजना गरिएको निःशुल्क शल्यक्रिया सेवामा सम्पर्क राख्नको लागी सिफारिस गरिएको वडाध्यक्ष धुव्रकर केसीले जानकारी दिनुभएको छ । 

यसअघि वडा नं. ४ बेतिनीमा आयोजना गरिएको आँखा जाँच शिविरमा २४३ जनाको आँखाको जाँच गर्ने क्रममा १५ जनामा मोतियाबिन्दु लागेको पाइएको थियो भने वडा नं. २ गाउँखर्कमा आयोजना गरिएको शिविरमा २३४ जनाको जाँच गर्ने आठ जनामा मोतियाबिन्दु लागेको पाइएको थियो । जिल्ला सामुदायिक आँखा केन्द्र मार्फत अभियानकै रुपमा सञ्चालन भइरहेको निःशुल्क आँखा जाँच एंव परीक्षण अन्तरगत अब भोलि आइतबार दुप्चेश्वर गाउँपालिकाको वडा नं १ को घ्याङफेदी स्वास्थ चौकीमा शिविर सञ्चालन गर्न लागिएको वडाध्यक्ष सुनबहादुर तामाङले जानकारी दिनुभएको छ ।