नारायणगढ मुग्लिन सडकखण्ड दिउसोँको समयमा बन्द हुने

Posted on: December 11, 2019 | views: 2713

मुग्लिन । नारायणगढ मुग्लिन सडकखण्ड शुक्रबारदेखि दैनिक चार घण्टा बन्द हुने भएको छ । सडक पहिरो रोकथामको काम आठ ठाउँमा बाँकी रहेको हुँदा दुई साताको लागी बाटो बन्द गर्न लागेको जिल्ला सुरक्षा समितिले जानकारी दिएको छ । बुधबार बिहान बसेको सुरक्षा समितिको बैठकले २७ मंसिरदेखि विहान ११ बजेबाट दिउँसो ३ बजेसम्म सडक बन्द गरेर काम गर्ने निर्णय गरेको हो ।  रायणघाटतर्फबाट छिर्ने यात्रुवाहक सवारीसाधनलाई पन्ध्र किलो बजारमा रोकिनेछ भने मालवाहक सवारीसाधनलाई दासढुंगामा रोकिनेछ ।

त्यस्तै, मुग्लिनतर्फबाट छिर्ने यात्रुवाहक सवारीसाधनमा काठमाडौंबाट छिर्नेलाई मुग्लिन बजारमा रोकिनेछ र पोखराबाट आउनेलाई बेनीटारमा रोकिनेछ। यस्तै, पोखराबाट आउने मालवाहक सवारीलाई आँबुखैरेनीमा र काठमाडौंबाट आउनेलाई लेवाटारमा रोकिने जिल्ला प्रहरी कार्यालय चितवनले जनाएको छ ।

यसअघि अघिल्लो वर्ष ११ ठाउँमा आधुनिक शैलीको रक नेटिक र रक बोल्टिङ गरेर पहिरो रोक्ने प्रयास गरिएको थियो । १२ ठाउँमा बायोइन्जिनियरिङ गरिएको थियो । सूचना अधिकारी खनालका अनुसार ३६ किलोेमिटर लामो मुग्लिन नारायणगढ सडकखण्डमा यसपटक ८ स्थानमा पहिरो जोखिम नियन्त्रणको काम हुँदैछ । उक्त सडकखण्डमा विश्व बैंकको ऋण सहयोगमा डबल लेनमा स्तरोन्नतिको काम भइसकेको छ।

आयोजनाले पहिरो रोकथामको काम गर्नका लागि सुरक्षाको दृष्टिकोणले सवारीसाधन रोक्नुपर्ने बताएको छ।