सामुदायिक वनबाट लाभलिने कार्यक्रम चलाउनुपर्छ : उपप्रमुख ढुङ्गाना

Posted on: November 07, 2019 | views: 3197

बाघखोर । बेलकोटगढी नगरपालिकाको उपप्रमुख कविता ढुङ्गानाले सामुदायिक वनको संरक्षणसगै यसबाट उपभोक्ताले लाभलिन सक्ने कार्यक्रम चलाउनको लागी जोड दिने बताउनुभएको छ ।

बेलकोटगढी नगरपालिकाको वडा नं. ९ मा रहेको ‘गजुरेलपाखा सामुदायिक सामुदायिक वन उपभोक्ता समितिको बुधबार आयोजित दशौ साधारण एंव अधिवेशनमा सम्बोधन गर्दै नगरउपप्रमुख ढुङ्गानाले सामुदायिक वनको रुपमा जनताले संरक्षण गर्दै आएका सयौ रोपनी क्षेत्रफलमा काठदाउरा एंव घाँसस्याउलाको विकल्पमा कबुलियत बनको अवधारणा अन्तरगत आम्दानी बढाउने कार्यक्रम चलाउन स्थानीय सरकारकोतर्फबाट पहल गर्ने बताउनुभएको हो । 

अहिले सामुदायिक वन संरक्षण सम्बन्धिको अधिकार प्रदेस सरकारमा रहेपनि प्रष्टता नभएको सन्दर्भमा स्थानीय सरकारको तर्फबाट नगरपालिकाले वन क्षेत्रको खाली रहेका स्थानमा अब घाँसस्याउलाको सट्टामा राम्रो आम्दानी गर्नसक्ने जडिबुटी तथा जंगली उत्पादनका विरुवा लगाउन सकिने बताउनुभएको छ । उहाँले वनमा उत्पादन हुने जडिबुटी अमूल्य सम्पत्तिको रुपमा आम्दानी र स्वदेसी उत्पादनको औषधी बनाएर मुलुकलाई आत्मनिर्भर बनाउन सकिने भएकाले त्यसको लागी सामुदायिक वनले त्यस्ता गुरुयोजना तथा कार्ययोजना बनाउनुपर्ने बताउनुभएको छ । 

कार्यक्रममा वडा नं. ९ का वडाअध्यक्ष बाबुराम गजुरेलले सामुदायिक वन संरक्षको लागी सुरुवाती समयमा चुनौती भएपनि अहिले घाँसदाउरा गर्नेको सङ्ख्या घटेकाले बृक्षारोपण गरेर वन विस्तार गर्नुपर्ने बताउनुभएको छ । 

अधिवेशनले पुनः रामप्रसाद दाहालको अध्यक्षमा नयाँ कार्यसमिति गठन गरेको छ । वनको साधारण सभामा सामुदायिक वन उपभोक्ता महासंघका प्रदेस प्रतिनिधि नारायणप्रसाद नेपाल, जनप्रतिनिधि, स्थानीय सरोकारवाला सहित उपभोक्ताहरुको सहभागिता रहेको थियो ।