स्थानीय पूर्वाधार विकास साझेदारी कार्यक्रम, सांसद् हितबहादुर तामाङबाट नयाँ र आकर्षक योजना तर्जुमा

Posted on: November 04, 2019 | views: 5526

विदुर । नुवाकोटको प्रतिनिधिसभा निर्वाचन क्षेत्र नं १ का सांसद् हितबहादुर तामाङले ‘स्थानीय पूर्वाधार विकास साझेदारी कार्यक्रम’ अन्तरगत प्राप्त ६ करोड रुपैयाँ बजेट बाँडफाँट गर्नुभएको छ ।

कार्यक्रम निर्देशक समितिको विदुरमा आइतबार बसेको बैठकले निर्वाचन क्षेत्र नं १ मा रहेका विभिन्न सातवटा गाँउपालिकाबाट माग भएर आएका तथा आवश्यकताको आधारमा बिनियोजन हुनेगरेर विभिन्न २९ योजनामा बजेट तर्जुमा गरिएको सांसद् तामाङले जानकारी दिनुभएको छ ।

अघिल्लो वर्षको जस्तै यो वर्ष पनि पूर्वाधार विकास साझेदारी कार्यक्रममा सडक निर्माण तथा विस्तारलाई प्रथामिकता दिएर बजेट तर्जुमा गरिएको छ । तर्जुमा गरिएको बजेटमा ककनी गाउँपालिकामा पाँच योजना, शिवपुरी गाउँपालिकामा चार वटा योजना, पञ्चकन्या गाउँपालिकामा ३ वटा योजनामा बजेट तर्जुमा गरिएको कार्यक्रम निर्देशक समितिका संयोजक तामाङले बताउनुभयो ।  

उहाँको अनुसार बाँकी दुप्चेश्वर गाउँपालिका, तादी गाउँपालिका, लिखु गाउँपालिका र  सूर्यगढी गाउँपालिकामा समान चार चार वटा योजना सहित प्रशासनिक खर्च बापत पाच लाख ४० हजार रुप्रयाँ रहने गरेर २९ योजनामा ६ करोड रुपैयाँ बजेट बिनियोजन गरिएको छ । 


अघिल्लो वर्ष चार करोड रुपैयाँ रहेकोमा यो वर्ष दुई करोड थप भएर प्राप्त भएको ६करोड रुपैयाँ बजेट अन्तरगत तोकिएको मापदण्ड अनुसार पचास लाख भन्दा ठूला योजना ६ वटा तर्जुमा गरिएको छ । सडकलाई प्रमुख प्राथमिकता दिएर बजेट बिनियोजन गरेपनि ठूलो योजनामा नयाँ योजनालाई प्रथामिकता दिइएको छ । 

ठूलो योजना अन्तरगत ५० लाखको योजनामा महाकालीको सिलामेमा रहेको जानकी माविको भौतिक पूर्वाधार निर्माण, गाउखर्कको माप्ले माविमा ग्याविन वाल लगाउन, तादी गाउँपालिका स्थित कोषगाढेको पहिरो नियन्त्रण गर्न, लिखु र पञ्चकन्यामा थालिएको सामूहिक तरकारी खेतीलाई प्रबद्धनका लागी कृषि उपज संकलन केन्द्र स्थापना गर्न बजेट छुट्टाइएको छ । 

बजेटले निर्वाचन क्षेत्रभित्रका सबै जनताले मागेका योजनाको सम्बोधन गर्न नसकेपनि सम्बन्धित स्थानीयतका सरोकारवाला, स्थानीयतहको गाँउसभा मार्फत प्रथामिकतामा रहेका योजना, कार्यक्रम परामर्श समितिको बैठक लगायतबाट राय एवम् सुझाव संकलन गरी भौतिक पूर्वाधार अन्तरगत सडकलाई प्रथामिकता र जनताको माग अनुसार अन्य क्षेत्रमा बजेट छुट्टाइएको कार्यक्रम निर्देशक समितिको संयोजक एंव सांसद् हितबहादुर तामाङले जानकारी दिनुभयो । 

बिनियोजित गरिएको बजेटको सही कार्यान्वयनको लागी कार्यक्रम निर्देशक समितिको पदाधिकारी सहित लाभग्राही उपभोक्ताले पनि चासो दिनुपर्ने सांसद् तामाङले बताउनुभएको छ । संसद्संग जोडिएको बजेट भएकाले कार्यकर्तालाई पोस्ने भन्ने आरोप लाग्ने गरेकालाई छुट्टाइएको बजेटमा आफूले हस्तक्षेप नगरी स्वतन्त्र तवरले ५० लाख भन्दा कममा उपभोक्ता समिति र त्यो भन्दा बढीमा बोलपत्र आह्वान गरेर कार्यन्वयन गराउन लागिपर्ने उहाँले बताउनुभयो । 

पूर्वाधार विकास साझेदारी कार्यक्रम अन्तरगतको बजेट तर्जुमाको लागी क्षेत्र नं. २ का सांसद् नारायणप्रसाद खतिवडाले यसअघि नै सम्बन्धित स्थानीयतहका सरोकारवाला, सरकारी निकाय, स्थानीयतहले प्रथामिकतामा राखेका योजनाका विवतरण संकलन, स्थानीयतहका प्रमुख–उपप्रमुख लगायतसंग छलफल मार्फत राय एवम् सुझाब संकलनको क्रममा रहेको बताउनुभएको छ ।

उहाँले यो साताभित्रै योजना तथा बजेट सार्वजनिक गर्नको लागी आवश्यक तयारीलाई अन्तिम चरणमा पु¥याएको जानकारी दिनुभयो ।