भूकम्पले लडाएका छपन्न हजार घर सरकारी अनुदानमा ठडिए

Posted on: October 15, 2019 | views: 3487

रामहरि न्यौपाने,
बेत्रावती । नुवाकोटमा भूकम्पले लडाएका छपन्न हजार भन्दाबढी घरको पुर्ननिर्माण सम्पन्न भएको छ ।
जिल्ला स्थित अनुदान ‘व्यवस्थापन तथा स्थानीय पूर्वाधार कार्यालय’को अनुसार हालसम्म ५६ हजार १०७ भूकम्प पीडित लाभग्राहीले सरकारी अनुदान लिएर भूकम्पले लडाएका घरको पुर्ननिर्माण गरेका छन् ।


पीडितलाई घर पुर्ननिर्माणका लागी नेपाल सरकार र सरकारबाट अनुमति लिएका सामाजिक सँस्थाले तीन किस्तामा रु तीन लाख अनुदान उपलब्ध गराएको तथ्याङ्क अनुसार जिल्लाको कुल लाभग्राही मध्ये ७३ प्रतिशतले घर निर्माण गरेर नयाँ घरमा बसोबास गर्न थालेका छन् ।


विसं २०७२ बैशाख १२ को विनासकारी भूकम्पले नुवाकोटमा ७६ हजार ८०९ घरमा पूर्ण क्षति पुगेको जिल्ला आयोजना कार्यान्वयन एकाईका प्रमुख शम्भुकुमार शाहले जानकारी दिनुभयो । उहाँको अनुसार तोकिएको मापदण्ड पूरा गरेर घर निर्माण गरेका धनीलाई स्थानीयस्तरमा खटिएका प्राविधिकको सिफारिसमा सरकारी अनुदान र रु तीन लाख उपलब्ध गराइएको हो ।


भूकम्प पीडित मध्ये ६७ हजार ९५५ लाभग्राही (८८.४७ प्रतिशत) ले आवास निर्माणको लागी घरको जग बसालेर अनुदानको दोश्रो किस्ता बापत रु एक लाख पचास हजार लिएर घर निर्माण अन्तिम चरणमा पु-याएका छन् ।


कुल लाभग्राही मध्ये ७३ हजार ५१ (९५.११ प्रतिशत) ले भूकम्प प्रतिरोधि आवास बनाउनका लागी सम्बन्धित वडा कार्यालयमा सम्झौता गरेका छन् । तोकिएको मापदण्ड अनुसार नयाँ घर निर्माण गर्ने प्रतिबद्धता जनाएका लाभग्राहीलाई सम्झौता पश्चात रु पचास हजार अनुदान उपलब्ध गराइसकेको कार्यालयका सूचना अधिकारी बिशाल सापकोटाले जानकारी दिनुभयो ।


उहाँको अनुसार घर निर्माणको लागी सम्झौता गरेर पहिलो किस्ता लिका अधिकांश लाभग्राहीले पुर्ननिर्माण अघि बढाएका छन् ।
“अनुदान रकम लिएका मध्ये थोरैले मात्र घर बनाउन बाँकी छ, तिनीहरुको लागी कार्यालयले ताकेता गरिरहेको छ ।” सापकोटाले भन्नुभयो “अहिलेको प्रगतिको आधारमा पुर्ननिर्माण जारी रहेमा तोकिएको अवधिमा भूकम्पले लडाएका घरको पुर्ननिर्माण सम्पन्न गराउन सक्ने आशा जगाएको छ ।”


सरकारले भूकम्प पीडित लाभग्राहीलाई आवास पुर्ननिर्माणको लागी तोकिएको मापदण्ड अनुसार घर बनाउदा सम्झौत गर्ने बित्तिकै पहिलो किस्ता बापत रु पचास हजार, घरको जग तहसम्म निर्माण गरेपश्चात दोश्रो किस्ता बापत रु एक लाख पचास हजार र घर निर्माण सम्पन्न गरेपछि अन्तिम तथा तेश्रो किस्ता बापत रु एक लाख गरेर तीन चरणमा रु तीन लाख अनुदान उपलब्ध गराउदै आएको छ । विनासकारी भूकम्पले लडाएको निजी आवासको पुर्ननिर्माण यो वर्ष भित्रै पूरा गर्ने सरकारी लक्ष्य छ ।