ठूलोगाँउसम्म बस सञ्चालनमा

Posted on: October 15, 2019 | views: 4022

साल्मे । नुवाकोटको किस्पाङ गाउँपालिकाको वडा नं. ४ को साल्मे स्थित ठूलोगाँउसम्म बस सेवा सञ्चालनमा आएको छ । यसअघि नै विस्तार भएको सडकमा गाँउपालिकाले मर्मत तथा सम्भारको लागी छुट्टाएको बजेटले दशै पर्वदेखि बस सेवा सञ्चालनमा आएको हो ।

 गाँउपालिकाको मात्र नभई जिल्लाकै दुर्गम क्षेत्रको रुपमा परिचित रहेको साल्मेको अन्तिम बस्ती ठूलोगाउँसम्म नै बस चल्न सक्ने गरेर दशै पर्व आउन एक साता अघि देखि सुरु भएको कामले फूलपातिको दिनदेखि मिनीट्रक र दशैको पूर्णिमाको दिनदेखि ठूला बसहर समेत चल्न थालेको किस्पाङ गाउँपालिका वडा नं. ४ ग्रामीण सडक मर्मत समितिका उपाध्यक्ष डुब दोर्जे लामाले जानकारी दिनुभयो ।


उहाँको अनुसार गाँउपालकाको अध्यक्ष छत्रबहादुर लामाले विशेष प्रथामिकता दिएर उक्त सडकको लागी गाउँपालिकाबाट छुट्टाएको ८ लाख ५० हजार रुपैयाँले स्काभेक्टर र श्रमदानबाट सडक मर्मत गरेर गाडी चल्न सक्ने बनाइएको हो । सडक मर्मत तथा सञ्चालनको लागी वडा नं ४ का वडाअध्यक्ष एकराज घले सडक मर्मतको लागी गठन भएको समितिका पदाधिकारीले निरन्तर कार्यक्षेत्रमा नै बसेर सहजिकरण गरेका थिए ।



साल्मेको ठूलोगाँउसम्म पुग्ने बसले साविकको सिङ्गो गाविस तथा अहिलेको वडा नं. ४ को सम्पूर्णबस्तीका बासिन्दालाई शहर आउजाउ गर्न, दैनिक उपभोग्य तथा घरायसी प्रयोजनको लागी चाहिने सामाग्रि गाँउ लैजान तथा गाँउमा उत्पादन भएका कृषि एंव अन्नबाली लगायतका सामाग्रि बजार पु¥याउन निकै सहज भएको सडक मर्मत समितिका अध्यक्ष मोहनराज घलेले बताउनुभयो ।