जोखिममा परेकी महिलालाई सैनिक र शिक्षकको रगतले बचायो

Posted on: September 29, 2019 | views: 10504

रामहरि न्यौपाने,
विदुर । नुवाकोटको तादी गाउँपालिका–५ का सावित्री भण्डारीको तीन महिनाको गर्भ खेर गएर अत्याधिक रक्तश्रावबाट जोखिममा परेको शरीर नेपाली सेना र शिक्षकले दिएको रगतले खतरामुक्त भएको छ ।


बिहीबार राती गर्भ खेर गएर हाल जिल्ला अस्पतालमा उपचाररत ३५ वर्षीया भण्डारीलाई आवश्यक पर्ने ‘ओ नेगेटिभ’ समूहको रगत नहुदाँ जोखिममा परेको शरीर बचाउन शनिबार जबरजंग गण, देवीघाटका सहसेनानी गौ बहादुर गुरुङ र विदुर नगरपालिका–७ का सुवास भण्डारीले रक्तदान गर्नुभएको हो ।



भण्डारी उपचाररत जिल्ला अस्पताल त्रिशूलीका डा.मधुकर दाहालका अनुसार यहाँको ‘ब्लड बैंक’मा रगत अभावले बचाउन कठिन अबस्था भएपछि गरिएको अपिल अनुसार सैनिक गुरुङ र स्पार्कल इन्टरनेशनल स्कुल कोलनीका शिक्षक सुवासले रगत उपलब्ध गराएका हुन् ।


तेश्रो सन्तानको रुपमा रहेको गर्भ खेर गएसगैँ अत्याधिक रक्तश्राव पश्चात बेहोस अबस्थामा भण्डारी शुक्रबार अस्पताल भर्ना हुनुभएको थियो ।


एम्बुलेन्स मार्फत काठमाडौ पठाउदाँ थप जोखिम हुने र हवाई माध्यमबाट लैजान मौसमको कारण उत्पन्न समस्याले जोखिममा परेको सुत्केरीको शरीर दाताको रगतले पुर्नजीवन मिलेको हो ।
दाताबाट प्राप्त दुई पिन्ट रगत उपलब्ध गराए पश्चात् उहाँको स्वास्थ्य अबस्था अहिले सामान्य हुँदै आएको चिकित्सकले बताएका छन् ।


जिल्लामा नेपाल रेडक्रस सोसाइटी मार्फत ब्लक बैंक सञ्चालनमा भएपनि नियमित रक्तदान कार्यक्रम नहुदाँ रगतको अभाव चर्किएको हो । रगतको अभावले जोखिममा पर्ने बिरामीलाई बचाउन नेपाली सेना, नेपाल प्रहरी सहित विभिन्न संघ संगठनमा आबद्ध सदस्य मार्फत हुने संकलनले सहजता पुग्ने गरेको छ ।