नुवाकोटमा भाइरल ज्वरोको बिरामी बढे

Posted on: September 26, 2019 | views: 12107

अस्मुना तिमिल्सिना,
विदुर । जिल्लामा भाइरल ज्वरो र टाइफाइडका बिरामी बढेका छन् । मौसम परिवर्तनसँगै संक्रमणबाट ज्वरोको बिराम बढेका हुन् ।
नुवाकोटको त्रिशूली अस्पताल सहित जिल्लाको भरको स्वास्थ्य संस्थामा रुघाखोकी र भाइरल ज्वरोका बिरामी बढ्दै गएको स्वास्थ्यकर्मीले बताएका छन् । केही सातायता पहिलेको तुलनामा अहिले बिरामी सङ्ख्यामा वृद्धि भएको त्रिशूली अस्पतालका सूचना अधिकारी भुवन केसीले जानकारी दिनुभयो ।


उहाँको अनुसार अस्पतालको बहिरङ सेवा (ओपिडी)मा दैनिक आउने दुई सयभन्दा बढी बिरामीमध्ये ६० प्रतिशत बढी भाइरल ज्वरोका रहेका छन् । भाइरलबाट सबैभन्दा बढी बालबालिका र वृद्ध प्रभावित भएका छन् ।


अस्पतालमा दैनिकरुपमा ५० जनासम्म बिरामी आउने गरेकोमा हाल दुई सयसम्म पुगेको जिल्ला अस्पतालका त्रिशूलीका डा.जयराम पाण्डेले बताउनुभयो ।
डा पाण्डेका् अनुसार त्रिशूली अस्पतालमा उपचार गराउन जाने मध्ये अधिकांशमा भाइरल ज्वरो र टाइफाइडको सक्रमण भेट्टिएका छन् ।


भाइरल ज्वरोका बिरामी थपिँदै जान थालेपछि उपचार गराउन अस्पताल प्रशासनलाई समस्या भएको छ । ५० शैया क्षमताको भएपनि भूकम्पको कारण भवनमा क्षतिपुगेपछि जिल्ला अस्पताल हाल ३५शैयाको प्रि–फ्याक भवनबाट सञ्चालनमा छ ।


सामान्य रुपमा ज्वरो आउने, टाउको, घाँटी, हातखुट्टा दुख्ने, रुघाखोकी लाग्ने, वाकवाकी हुने, जीउ दुख्नेलगायत लक्षण भएका बिरामीको सङ्ख्या बढिरहेको छ । जिल्ला अस्पताल, विभिन्न स्वास्थ्य इकाईहरुमा अहिले उपचार गराउने बिरामीको सङ्ख्या बढेपछि स्वास्थ्यकर्मीलाई सेवा प्रभावकारी बनाउनको लागी निर्देशन दिइएको स्वास्थ्य कार्यालय नुवाकोटका प्रमुख राममणि घिमिरेले जानकारी दिनुभयो ।

भाइरल ज्वरो सहितको रोगको प्रकोप फैलन नदिनको लागी घर वरिपरी सफा राख्ने, पानी जम्ने खाल्टा पुर्ने तथा सरसफाइमा ध्यान दिन आह्वान गरिएको छ ।