नुवाकोटमा गाई भैँसीलाई सुत्केरी भत्ता

Posted on: September 24, 2019 | views: 12149

ककनी । नुवाकोटको ककनी गाउँपालिकामा गाई भैसी पाल्ने किसानले सुत्केरी भत्ता पाउने भएका छन। गाई भैँसी व्याएपछि किसानलाई तीन हजार रुपैयाँ सुत्केरी भत्ता दिने गाउँपालिकाले जनाएको छ।

पालिकाले आवश्यक बजेट नै विनियोजन गरेर सुत्केरी भत्ता वितरणको सुरुवात गरेको अध्यक्ष मनबहादुर लामाले बताए । कृषकहरुलाई पेसा प्रति जागरुक र आत्मनिर्भर बनाउनको लागी गाउँपालिकाले यस्तो निर्णय गरेको उनको भनाई छ ।

‘गाउँघरमा गाई भैंसी पाल्ने प्रवृति हराएको छ’, उनले भने, ‘किसानलाई प्रोत्साहित गर्न र दुध उत्पादन बढाउन सुत्केरी भत्ताको व्यवस्था गरिएको हो।’

आगामी दिनमा कृषि पेशा र पशुपालनबाट किसानहरु आत्मनिर्भर बन्नको लागी ककनी गाउँपालिकाले अन्य सेवा र सुबिधाहरुको लागी पहल गर्ने अध्यक्ष लामाले जानकारी दिए ।