निजामती सेवा दिवसको अवशरमा नुवाकोटमा रक्तदान र वृक्षारोपण गरियो

Posted on: September 08, 2019 | views: 5118

विदुर । निजामती सेवा दिवसको अवशरमा आज नुवाकोटमा रक्तदान र वृक्षारोपण गरिएको छ । जिल्ला स्थित निजामती सेवा दिवस मूल समारोह समिति र आधिकारिक ट्रेड युनियनको सयुक्त आह्वानमा विदुरमा आयोजित रक्तदानमा चौध दाताले रगत दान गरे ।


जिल्लामा हाल रगतको मौजुदा प्रयाप्त भएकाले डेंगुबाट प्रभावित बिरामीको लागी सहयोग गर्ने उद्देष्यले दिवसको अवशरमा निजामती सेवामा आबद्ध कर्मचारी एवम् समाजसेवी मार्फत रगत संकलन गरिएको आधिकारिक ट्रेड युनियनका कार्यबाहक अध्यक्ष मच्छिन्द्रनरसिंह प्याकुरेलले जानकारी दिनुभयो ।


उहाँको अनुसार संकलित रगत काठमाडौ पठाइएको छ । रगतदान कार्यक्रम जिल्ला रेडक्रस सोसाइटीसंगको सहकार्यमा गरिएको हो ।



यसैगरी, दिवसको अवशरमा आजै विदुर नपा–२ स्थित बाराबाही सामुदायिक वनमा विभिन्न काठ र फलफूल जन्य जातका विरुवा बृक्षारोपण गरियो । बृक्षारोपण कार्यक्रम डिभिजन वन कार्यालयसंगको सहकार्यमा गरिएको हो ।

दुवै कार्यक्रममा जिल्लामा कार्यरत निजामती कर्मचारी सहित सुरक्षानिकाय, सरोकारवाला एवम् सञ्चारकर्मीको सहभागिता थियो ।


अघिल्ला वर्षहरुमा निजामती कर्मचारीहरुले महत्वका साथ मनाउने गरेको भएपनि यो वर्ष खासै उल्लास भने देखिएन ।

अघिल्ला वर्ष दिवसलाई महत्वपूर्ण पर्वको रुपमा मनाउने निजामती कर्मचारीहरुले विभिन्न रचनात्मक गतिविधि, प्रतिस्पर्धात्मक क्रियाकलाप, उत्कृष्ट कर्मचारीलाई सम्मान लगायतका कार्य साताव्यापी रुपमा मनाउने र आजको दिन औपाचारिक कार्यक्रम हुने गरेको भएपनि यो वर्ष सामान्य रुपमा नै मनाइएको हो ।


पछिल्ला समयमा निजामती दिवसलाई आकर्षक बनाउनुपर्ने चुनौती बढिरहेको समयमा दिवसलाई सामान्य रुपमा मनाएको प्रति आबद्ध कर्मचारी पनि निराश बनेका छन् ।