नुवाकोटमा विद्यालयबाट फर्कदै गरेका बालकलाई खोलाले बगायो

Posted on: August 27, 2019 | views: 17869

किस्पाङ । नुवाकोटको किस्पाङ गाउँपालिका–१ भाल्चेका सरोज घलेलाई सोमबार विद्यालयबाट फर्कदै गर्दा खोलाले बगाएर बेपत्ता बनाएको छ । नौ वर्षका घलेलाई स्थानीय गन्दो खोलाले बगाएर बेपत्ता बनाएको प्रहरी चौकी फिकुरीले जनाएको छ ।


चौकीका इञ्चार्ज प्रहरी सहायक निरीक्षक महानन्द यादवका अनुसार किस्पाङ–३ स्थित होलिभिजन पब्लिक बोर्डिङमा अध्ययन गरेर फर्कदै गरेका घलेलाई खोलाले बगाएपछि खोजी गरेपनि अहिलेसम्म अबस्था थाहा हुन सकेको छैन ।
विद्यालयबाट फर्कदै गरेका तीनजना मध्ये सरोजलाई बगाएर बेपत्ता बनाएपछि स्थानीयको सहयोगमा प्रहरीले खोजतलास जारी राखेको छ ।


किस्पाङको वडा नं. १ बाट गाउँपालिकाको कार्यालय समेत रहेको स्थान वडा नं. ३ को काहुले तर्फ जान गन्दो खोलामा पुल नहुदाँ वर्षाको समयमा आउने बाढीले आवतजावतमा समस्या हुदैँ आएको स्थानीय भीमबहादुर घलेले गुनासो गर्नुभयो ।  


तस्वीरहरु सुकबहादुर घलेको फेसबुकबाट ।