बालुवा झिक्ने खाल्डोमा डुबेर मृत्यु प्रसङ्ग : मृत्तकका परिवारलाई २५–२५ लाख दिने सहमति

Posted on: August 14, 2019 | views: 6988

विदुर । बालुवा उत्खनन गरेको खाल्डोमा डुबेर नुवाकोटको ककनी गाउँपालिका–१ मा सोमबार ज्यान गुमाएका दुई जनाको परिवारलाई क्षतिपूर्ति स्वरुप रु २५–२५ लाख उपलब्ध गराउने सहमति भएको छ । उक्त सहमति भएसगैँ पीडित परिवारले शव बुझेका छन् ।


कोल्पुखोला किनारमा अबैध रुपमा बालुवा उत्खनन्को क्रममा बनेको खाल्डोमा परेकी स्थानीय १३ वर्षीयाँ बिनिता बलामी र उनलाई बचाउन गएकी सिन्धुलीको फिक्कल गाउँपालिका–३ की ३५ वर्षीय लक्ष्मी तामाङको सोमबार साँझ डुबेर मृत्यु भएको थियो । पीडित परिवार र आफन्तले अबैध कार्यमा संलग्न व्यक्तिहरुबाट उचित क्षतिपूर्ति भराउन माग राख्दै गर्दै आएको बिरोध प्रदर्शन सहमतिसगैँ स्थगित भएको नुवाकोटका प्रमुख जिल्ला अधिकारी द्रोण पोखरेलले जानकारी दिनुभयो ।


उहाँको अनुसार मृत्तकको परिवारलाई अबैध बालुवा झिक्न प्रयोग भएको स्काभेक्टर धनी धादिङ स्थित धाक्रे गाउँपालिका–२ का रामकृष्ण रेग्मी, बालुवा झिक्न प्रयोग भएको खेतका धनी ओखरपौवाका मोहनकृष्ण श्रेष्ठ र बालुवा झिक्ने सोही स्थानका राजेन्द्र बलामीबाट क्षतिपूर्ति रकम भराउने निर्णय भएको हो ।


पीडित परिवारलाई रेग्मीबाट रु ३३ लाख, श्रेष्ठबाट रु ११ लाख र बलामीबाट रु छ लाख क्षतिपूर्ति भराउने सहमति भएसगै स्थानीयको बिरोध रोकिएको छ । क्षतिपूर्ति रकम मध्ये पीडित परिवारलाई आज रु एक–एक लाख दिइएको छ भने बाँकी रु २४–२४ लाख पैतिस दिनभित्र उपलब्ध गराउने सरोकारवालाबीच सहमति भएको छ ।


सहमति भएसगै आफन्तले शव बुझेको गाउँपालिकाको उपाध्यक्ष सिता खतिवडा (लामा)ले बताउनुभयो ।