जनप्रतिनिधिलाई सुरक्षाको प्रत्याभूति दिलाउन जिसस प्रमुख तामाङको माग

Posted on: August 05, 2019 | views: 8904

विदुर । नुवाकोटको ककनी गाँउपालिका वडा नं.१ को वडा कार्यालयमा गत साउन १४ गते राती भएको बम विष्फोटबाट पु-याएको क्षतिको जिल्ला समन्वय समिति नुवाकोटका प्रमुख सन्तमान तामाङले स्थलगत निरीक्षण एंव अवलोकन गर्नुभएको छ ।


अज्ञात समूहको आगजनीले पूर्ण क्षति पु-याएको वडा कार्यालयको अवलोकन पश्चात जिसस प्रमुख तामाङले जनप्रतिनिधिलाई सुरक्षाको प्रत्याभूति दिलाउन राज्य जिम्मेवार हुनुपर्ने माग गर्नुभयो ।


‘जनसत्ता नुवाकोट’को नाममा वडाअध्यक्षलाई धम्की दिएको र त्यस पश्चात अज्ञात समूहबाट वडा कार्यालयमा भएको बम विष्फोटले संघीयता कार्यान्वयनको चरणमा उत्साहित भएका जनतालाई गाँउबस्तीबाटै पाइरहेको सेवा प्रभावित बनाएको भन्दै जनप्रतिनिधि र सेवा प्रवाह गर्ने सरकारी कार्यालको सुरक्षा व्यवस्था प्रभावकारी बनाउन सरकारसंग जिसस प्रमुख तामाङले माग गर्नुभएको हो ।

उहाँले घटनास्थलको अनुगमन पश्चात जिल्ला स्थित सुरक्षा निकायका पदाधिकारीलाई फोन मार्फत जनतालाई सेवा पु-याउन खटिएका जनप्रतिनिधि र सेवा दिने कार्यालयको सुरक्षा भरपर्दो, विश्वसनीय एंव शान्तिपूर्ण कायम गराउनको लागी पनि निर्देशन दिनुभयो ।



बम विष्फोटबाट वडा कार्यालयमा रहेका कागजात, उपकरण, फर्निचर लगायतका सबै सामाग्रि नष्ट भएको थियो भने कार्यालयको झ्याल, ढोका सहित भवनमा समेत क्षति पुगेको छ । उक्त भवनको यथाशक्य पुर्ननिर्माण गराउन सम्बन्धित पक्षको ध्यानाकर्षण गराउने उहाँले प्रतिबद्धता जनाउनुभयो ।