ककनी गाउँपालिका वडा नं १ को कार्यालयमा बम विष्फोट

Posted on: July 31, 2019 | views: 13286

विदुर । नुवाकोटको ककनी गाउँपालिका वडा नं. १ को वडा कार्यालयमा अज्ञात समूहले गएराति बम विस्फोट गराएका छन् । बम विस्फोटबाट वडा कार्यालयमा रहेका महत्वपूर्ण उपकरण तथा कागजपत्र सबै जलेर नष्ट भएको वडाअध्यक्ष चन्द्रबहादुर श्रेष्ठ (बलामी)ले जानकारी दिनुभयो ।


उहाँको अनुसार रातको ११ः४५ बजेको समयमा आएको ५–६ जनाको समूहले कार्यालयमा तोडफोड गरेर कागजात, कम्युटर, फर्निचर लगायतका समाग्रि एकैस्थानमा राखेर आगजनी सहित बम विष्फोट गराइएको पाइएको हो ।


वडा कार्यालय सार्वजनिक स्थानमा सँस्थाले बनाएको दुई कोठे पक्कि भवनबाट सञ्चालन हुदै आएको थियो । ठूलो आवाज सहितको विष्फोटले वडा कार्यालय रहेको भवनको झ्याल ढोका, गाह्रो तथा ढलान समेत फुट्न पुगेको प्रहरीले जनाएको छ ।



विष्फोट भएको स्थान नजिकै जनसत्ता नुवाकोटको नाममा भेट्टिएको पर्चामा वडाअध्यक्ष कार्यालयमा नबसी काठमाडौ बस्ने गरेको, फर्जी बिल बनाएर राजश्व घोटला गरेको, नदी दोहनमा संलग्न रहेको, स्थानीयबासीले निर्माण गरेको मन्दिरको सिँढी वडा मार्फत बनाएको भनेर १७ लाख रुपैयाँ अनियमितता गरेको लगायतको अभियोग वडाअध्यक्ष श्रेष्ठ माथी लगाइएको छ ।


बम विष्फोटको जिम्मेवारी अहिलेसम्म कसैले नलिएपनि नेकपा विप्लव समूहबाट भएको हुनसक्ने प्रहरीले अनुमान गरेको छ ।