सुत्केरीको मृत्यु प्रकरण : पीडितलाई क्षतिपूर्ति र छानबिन समिति बनाइने

Posted on: July 27, 2019 | views: 13512

 विदुर । जिल्ला अस्पताल त्रिशूलीमा सुत्केरी भएकी एक महिलाको मृत्यु भएको विषयमा छानबिन गर्न समिति गठन गरिने भएको छ ।


नुवाकोटको तारकेश्वर गाउँपालिका–५ की गोमा वस्तीको सुत्केरी पश्चात अत्याधिक रक्तश्रावको कारण बिहीबार मृत्यु भएपछि चिकित्सकको लापरबाहीको आरोप लगाउदै बिरोध चर्किएको थियो । उक्त घटनालाई लिएर आज जिल्ला प्रहरी कार्यालयमा बसेको सरोकारवाला सम्मिलित बैठकले पीडित परिवारलाई क्षतिपूर्ति र घटनाको सम्बन्धमा छानबिन गर्न समिति गठन गर्ने समझदारी भएको हो ।

उक्त सहमतिसगै बिहानदेखि अबरुद्ध गल्छी–त्रिशूली–स्याफ्रुबेसी सडक मार्गको महादेवफाँटमा पु¥याएको अबरोध अपरान्हदेखि खुलेको छ । तीन बुँदे सहमतिमा ज्यान गुमाएकी सुत्केरीको नवजात शिशुको पालन–पोषण तथा अध्ययनको लागी सहयोग स्वरुप तारकेश्वर गाउँपालिकाले रु एकलाख, अस्पतालका कर्मचारीबाट रु पचास हजार र थप रकम जिल्ला प्रशासन कार्यालयको पहलमा जुटाइने सहमति भएको हो ।
यसैगरी, सामान्य अबस्थामा सुत्केरी भएकी महिलाको अत्याधिक रक्तश्रावको कारण ज्यान गुमाएकाले उनको उपचारमा संलग्न चिकित्सकको कमजोर भए–नभएको यथार्थता पत्ता लगाउन अस्पताल विकास समितिले छानबिनको लागी एक समिति गठन गर्ने सहमति भएको प्रमुख जिल्ला अधिकारी द्रोण पोखरेलले जानकारी दिनुभयो ।


सहमति पत्रमा प्रजिअ सहित अस्पताल विकास समितिका अध्यक्ष अर्जुनप्रसाद न्यौपाने, मेडिकल सुपरिटेन्डन डा.रेमकुमार राई, मृत्तक गोमाको श्रीमान गोविन्द वस्ती, तारकेश्वर गाउँपालिका अध्यक्ष रमेशबहादुर वस्ती लगायतले हस्ताक्षर गरेका छन् ।


सुत्केरी व्यथाले च्यापेपछि बुधबार जिल्ला अस्पतालमा भर्ना भएकी गोमाले बिहीबार बिहान छोरा जन्माएकी थिइन् । बच्चा जन्माउदाँ खुला भएको पाठेघर बन्द नहुदाँ अत्याधिक रक्तश्रावको कारण यहाँ उपचार हुन नसकेपछि उनलाई हेलिकोप्टर मार्फत शिक्षण अस्पताल महाराजगञ्ज पु¥याएपनि त्याहाँ पुग्नु अगावै मृत्यु भएको चिकित्सकले बताएका थिए ।
उनले जन्माएको शिशुको काठमाडौ स्थित कान्ती बाल अस्पतालमा उपचार भइरहेको र स्वास्थ्य अबस्था सामान्य रहेको छ ।